Delar av vegarbeidet på Dalsfjord- sambandet blir stogga ei veke til

Det seier Einar Hovland som er prosjektleiar for Statens vegvesen på Dalsfjordsambandet. Han seier dei no jobbar for å få inn ein geolog som kan gå over området på vegen på nordsida av fjorden.

– Vi vil no få inn ein geolog til å gå over spesielt dei partia som det har rasa ifrå og områda rundt, seier Hovland til NRK.no torsdag føremiddag.

Slo alarm om rasfare

Tysdag kveld vart det klart at Vegvesenet hadde bestemt seg for å stogge vegarbeidet på 700 meter av dei seks kilometerane med veg som skal byggjast ved Eikenes på Askvoll-sida. Bakgrunnen er uromeldingar frå entreprenøren knytt til rasfare.

• LES OGSÅ: Vegvesenet stoggar delar av veg- bygginga på Dalsfjordsambandet

Ein anleggsleiar på vegen har mellom anna slått alarm i media om rasfaren og sa at dei hadde hatt flaks fleire gonger. Etter fleire ras i området var han uroa for tryggleiken til både arbeidarane og trafikantar på vegen.

– Vi har hatt flaks fleire gonger. Hendingane har vore på vår side, sa Bjørn Tore Årevik i KA Aurstad AS til NRK tidlegare denne veka.

• LES OGSÅ: Anleggsleiar slår alarm om rasfarleg Dalsfjordsamband
• LES OGSÅ: Prøvde å stogge intervju om rasfare

Tok signala på alvor – stengde veg

Entreprenør NCC varsla at dei ville innstille arbeidet fram til Vegvesenet hadde gjort i ny geologisk vurdering av området. På NRK Vestlandsrevyen tysdag sa avdelingsdirektør Nils Magne Slinde i Statens vegvesen at dei tek signala på alvor.

– Vi må ta på alvor dei signala som arbeidarane på plassen gir, og følgje dei opp på ein skikkeleg måte, sa Slinde til NRK.no

• LES OGSÅ: Forskar meiner det var rett å varsle om kitikkverdige forhold på vegen
• LES OGSÅ: Sterkt kritisk til Statens vegvesen

Ventar på rapport

Hovland som er Statens vegvesen sin prosjektleiar på Dalsfjordsambandet seier det er vanskeleg å seie noko heilt sikkert om kor tid arbeidet med denne delen av vegen kan starte opp att.

Det er i hovudsak to problemområde der det losnar stein frå fjellsida. Årsaka er ifølgje Hovland mykje regn, frost og tele som gjer at steinblokker losnar.

– Vi ventar på rapporten frå geologen slik at vi får vite kva vi bør gjere før vi startar opp att.

– Og kva vi eventuelt må gjere seinare som ei permanent sikring, seier Hovland til NRK.no.

Truleg vil også neste veke gå med til dette arbeidet, noko som vil seie at arbeidet tidlegast kan starte opp att over neste helg.

• LES OGSÅ: Held fast ved at Dalsfjordsambandet ikkje sprekk økonomisk
• LES OGSÅ: Meiner Dalsfjordsambandet er trygt slik det er planlagd

Meiner tunnel ikkje blir nødvendig

– Fryktar du at tunnel skal bli den einaste løysinga slik enkelte har hevda?

– Nei, desse tilfella vi har hatt på Eikenes no, dei greier vi å sikre ved å sprenge ned det som er laust, seier Hovland.

Både Bjørn Tore Årevik i KA Aurstad AS og geolog Einar Alsaker i Sunnfjord Geosenter har teke til orde for at ein bør byggje tunnel forbi dette området.

• LES OGSÅ: Fryktar rasfarleg Dalsfjordsamband
• LES OGSÅ: NCC saksøkjer fylkeskommunen for 93 millionar for ekstrakostnader