Hopp til innhold

Ulvatn forklarte seg i retten i dag

I dag har fylkesleiar Magne UIvatn i Fellesforbundet forklart seg i Fjordane tingrett. Han er skulda for å ha trakassert arbeidskollegaer på jobben.

Magne Ulvatn

FORSTÅR IKKJE: Magne Ulvatn forklarer seg i retten i dag. Han stiller seg uforståande til at han skal ha drive med trakassering.

Foto: Bård Siem / NRK

Det er Jarle Kirketeig som har gått til arbeidsrettssak for å få jobben sin som organisasjonsmedarbeider tilbake. Han krev også 300 000 i oppreising for det han meiner er mobbing og usakleg oppseiing.

Kirketeig hevdar han er blitt mobba og trakassert, og at det i hovudsak var Magne Ulvatn, den valde leiaren i Fellesforbundet i fylket, som stod for det.

Gav masse skryt

Ulvatn forklarte i dag at i starten gjorde Kirketeig ein kjempejobb då han blei tilsett. Han fekk mange nye medlemmer og Kirketeig fekk masse skryt for dette.

På denne tida hadde Kirketeig 50 prosent stilling, men jobba likevel veldig lange dagar. Dette var Ulvatn uroa over og bad han jobbe mindre.

Blei ein amper tone

Etter kvart byrja ting å endre seg, forklarte Ulvatn i retten. Då han plukka på at Kirketeig i forhold til all jobbing, opplevde han at Kirketeig trekte seg tilbake. Det blei ein dårleg kommunikasjon, amper tone og høglydt krangel.

Ulvatn fortel at han fekk større stillingsprosent og seier at dette opplevde Jarle Kirketeig som ein trussel mot hans eigen stilling.

Han opplevde at Kirketeig blei oppfarande og sint og det blei etter kvart søkt ekstern hjelp som skulle mekle.

Trudde dei var gode kameratar

Ein annan som meiner han blei trakassert av Ulvatn er Jan Olav Gjerde som i dag er ordførar i Hyllestad. Han forklarte seg i retten onsdag om korleis han opplevde jobben som organisasjonsarbeidar i Fellesforbundet avdeling 19 i 2004.

I retten kom han med fleire døme på det han meiner var trakassering, kontrollerande atmosfære og stadige opprivande diskusjonar.

Ulvatn forklarte i retten i dag at han trudde Gjerde og han var gode kameratar. Han fortel at han ikkje forstår at han skal ha drive med trakassering av Gjerde.

Magne Ulvatn forklarte seg i halvannan time i dag. Klokka seks sette retten sluttstrek for dagen og Ulvatn held fram forklaringa si fredag. Då skal han mellom anna bli utspurt av advokaten til Jarle Kirketeig.

(Artikkelen held fram under biletet)

Får støtte frå psykolog og fastlege

Jarle Kirketeig i Fjordane tingrett

FEKK SPARKEN: Jarle Kirketeig har gått til arbeidsrettssak for å få jobben sin tilbake.

Foto: Bård Siem / NRK

Tidlegare i dag kom det fram at psykologen og fastlegen støttar opp under påstandane til Jarle Kirketeig om at han har vorte psykisk sjuk på grunn av mobbing og trakassering på arbeidsplassen då dei forklarte seg i dag.

Psykolog og lege har gjennomført personlegheitstestar av Jarle Kirketeig. Dei har vore omfattande med 500 spørsmål. Her har Kirketeig ein svært låg score på løgnaktigheit – han er altså truverdig, meiner legen.

Psykologen karakteriserte Kirketeig som skvær, snill, engasjert, rettskaffen og pliktoppfyllande. Han fortalde at Kirketeig vart psykisk sjuk og deprimert på grunn av vanskelege forhold på arbeidsplassen.

Meiner Ulvatn bør trekkje seg

Også Roger Johansen vitna i Fjordane tingrett i dag. Han er ein erfaren kar som har jobba i 30 år i Fellesforbundet i Bergen. Han sa at han aldri har jobba med ein så samvitsfull og ordentleg mann som Kirketeig. Han meinte Ulvatn med sin arbeidsstil ikkje passar inn i Fellesforbundet, og at han burde trekkje seg frå stillinga.

På spørsmål frå advokaten til Kirketeig, meinte Johansen at Ulvatn burde ekskluderast om han ikkje ville trekkje seg sjølv.

Tidlegare i rettssaka har det komme fram at nestleiar Bjørn Kormeseth har avvist at det var mobbing og trakassering. Han sa at Kirketeig ikkje vart mobba av Ulvatn, men at det handlar om ein vanleg arbeidskonflikt mellom dei to.

I alt 18 namn står på vitnelista i denne rettssaka som varer ut veka.