Tel alle norske og utanlandske vogntog

Norsk transportnæring kjenner seg truga av ulovleg og rimelegare transportørar frå utlandet. Den siste tida har fleire utanlandske transportørar blitt tekne for ulovleg køyring.

Leiar Rolf Olav Tenden i lastebileigarforbundet i Sogn og Fjordane seier dei skal kartleggje kor stor del utanlandske trailerar som passerer på hovudvegane i Norge.

– Vi mistenkjer at det går fleire enn både vi og myndigheitene er klar over. Vi tel rett og slett for å få tal som vi kan bruke opp mot styresmaktene.

(Artikkelen held fram under videoen)

Avslørte fleire transportselskap

Det er strenge reglar for korleis utanlandske transportørar kan drive transport innanlands i Norge, såkalla kabotasje. Når eit utanlandsk vogntog køyrer inn i Norge med internasjonal transport, kan det etter dette køyre maksimalt tre turar i løpet av ei veke innanfor Norges grenser. Så må bilen ut av landet.

Siste veke avslørte Statens vegvesen på Håbakken i Lærdal tre utanlandske transportselskap som braut denne regelen.

• LES OGSÅ: Avdekka grove lovbrot under kontrollar på Håbakken
• LES OGSÅ: Lastebilsjåfør må betale 30.000,-

Ingen registrering, berre teljing

Aksjonen til Norges Lastebileigarforbund held fram til onsdag klokka 12. Dei står på 20 stader rundt om i landet og trafikken blir talt begge vegar.

– Då lagar vi statistikk ut frå målepunkta over heile landet. Vi tel dei store bilane, ikkje lokaltrafikk og små distribusjonsbilar.

– Korleis skal de klare å sile ut kven som køyrer lovleg og ikkje?

– Vi kan ikkje sjekke kva dei gjer her i landet og kor lenge dei blir. Vi skriv heller ikkje ned bilnummer. Dette er berre ei teljing for å vise omfanget av trailerar på gjennomfartsvegane

– Kva vil de oppnå med dette?

– Vi håper å få auga opp for at den utanlandske trafikken i Norge er større enn det myndigheitene meiner, seier Tenden.

• LES OGSÅ: Stoppa vogntog som dreiv ulovleg godstransport
• LES OGSÅ: Utanlandske vogntog kan køyre ulovleg i Norge

Her er teljepunkta til lastebileigarforbundet:

• E6 Svinesund
• E6 Kløfta
• E18 Esso Ramstadsletta (sørgåande) og E18 Shell Høvik (nordgåande)
• Rv2 Kongsvinger
• Rv 3 Tiur'n
• Rv 25 Hernes
• E16 Roa
• E6 Kvam
• E16 Fagernes
• E18 Gulli
• E16 Sundvollen
• E134 Brunkeberg
• E16 Trengereid
• Rv 15 Strynefjellet
• E39 Førde/Skei
• E136 Åndalsnes
• E6 Berkåk
• E6 Bjerkvik