«Torild» tar psykologtimen heime: – Heilt okei

«Velkommen til videokonsultasjon», seier ei robotstemme i det «Torild» loggar seg inn.

Denne dagen tar ho psykolog-timen heime ved stovebordet. Trygg for smitte, og med gode resultat, kan ho snakka med psykologen sin via skjermen.

– Eg syns dette er heilt okei. Her er eg heime i trygge omgjevnadar. Og eg føler me har heilt god kontakt når me møtest på denne måten.

Gode erfaringar

Tiltak som har tvunge seg fram med smittevernrestriksjonane på grunn av korona har fungert svært godt. No skal telefon- og videokonsultasjonar bli vanleg for mange slags pasientgrupper.

– Erfaringa er god. Stort sett opplever eg at dette er ganske likt som møta folk ansikt til ansikt.

Det seier Ane Wilhelmsen-Langeland, psykologspesialist i Helse Bergen.

Og det har gått så bra at helseføretaket er i full gang med å førebu videobehandlingar i stor stil, også etter koronaen.

Direktør Eivind Hansen seier dei allereie har bede heile organisasjonen bu seg på dette.

– Me legg planar for 2021 med ambisjonar om å ta noko behandling over på desse plattformene.

Til dømes fortalde NRK i september at Helse Bergen var først ute med eit nettbasert behandlingsopplegg mot angst og depresjon. Etter kvart skal pasientar over heile landet få dette tilbodet.

Sparer tid og pengar

Helsedepartementet har no lagt til rette for at helseføretaka skal bli kompensert for digitale møte på same vis som behandling på sjukehuset. Direktøren trur alle vil tene på endringane koronapandemien har tvunge fram.

– Dermed brukar me mindre tid på å henta pasientar hit. Dei får redusert reisetid, og me får redusert reisekostnad. Det er mange slike faktorar.

Men han er open for at denne forma for behandling og konsultasjon må evaluerast for dei ulike pasientgruppene.

– Me må undersøka etter kvart om denne behandlinga er forsvarleg og god.

Både psykolog og pasient er klare på at videosamtalen ikkje kan erstatta all form for behandling. Men Wilhelmsen-Langeland meiner dette er ein del av helsevesenet, også i ei koronafri tid.

– Det trur eg, og det tykkjer eg det bør vera. Eg kjem til å tilby det for dei som ønsker det.

Fastlegen kan bli med

Ho seier at det i tillegg kan vera nyttig at også fastlegen til pasienten ved behov kan delta på videokonsultasjonen.

Det har ho allereie prøvd ut i nokre tilfelle.

Også sjukehusdirektør Hansen seier det kan vera ei god løysing, særleg i distrikt med lengre reiseavstandar.