– Med berre éi eining i fylket blir utkantane – Nordfjord og Sogn – tømde for politiressursar. Der blir mindre faglege politimiljø og mindre attraktivt å arbeida, seier Eid-ordførar Alfred Bjørlo (V).
Denne hausten har det sigla opp ein strid om organiseringa av politiet, som splittar Sogn og Fjordane, nemleg kor mange regionar ordensmakta i fylket skal delast inn i.
Politimeister Kaare Songstad har sendt to alternativ ut på høyring, som ein del av politireforma:
- Tre regionar, som i dag (politimeisteren kallar regionane for «geografiske driftseiningar»)
- Éin region
No har kommunane fått sagt sitt om den nye organiseringa av politiet, og biletet er tydeleg: Nordfjord og indre Sogn vil ha tre regionar og står såleis steilt mot Sunnfjord, som vil ha éin.
Indre sentralisering
Bjørlo i nordfjordkommunen Eid fryktar ei indre sentraliseringa, og viser til signala frå nasjonalforsamlinga:
– Stortinget har sagt at Justisdepartementet og Politidirektoratet skal sjå spesielt på fylke, der dagens geografiske einingar fungerer godt, og sikra at dei blir tekne vare på i politireforma.
FRAMLEIS UVISST: Politimeisteren Kaare Songstad har ikkje sagt om han vil ha éin (til venstre) eller tre politiregionar (til høgre) i Sogn og Fjordane. Vest politidistrikt seier at politireformtilrådinga hans til Politidirektoratet ikkje kjem på torsdag som planlagt, men før jul ein gong.
Foto: Vest politidistriktI Sunnfjord håpar derimot eit samla ordførarkorps at Songstad skal landa på éin region. Ved å ha tre mindre kontor vil ikkje politiet greia å byggja opp spisskompetansen dei treng i framtida, seier ordførar Ola Teigen (Ap) i Flora, der den gamle politidistriktsleiinga i Sogn og Fjordane sat:
Treng spesialetterforskarar
– Spesielt viktig er å ha etterforskingsmiljø som spesialiserer seg på seksuelle overgrep, vald i nære relasjonar og overgrep mot born. Dei er heilt avhengige av å få bygd opp slike kompetansemiljø også i Sogn og Fjordane, seier Teigen.
Splittinga fogderia og kommunane imellom slår òg inn i fylkespolitikken, der eit knapt fleirtal i fylkesutvalet fekk gjennomslag for éin politiregion.
Også dagens tre regionlensmenn har vore delte i synet: Der Dag Fiske i Sunnfjord vil ha éin region og vist til at politijobben er blitt mykje meir spesialisert, har Tormod Hvattum i Nordfjord og Arne Johannessen i Sogn argumentert for tre, som i dag:
- Les òg:
TO MOT EIN: – Blir Sogn og Fjordane éin politiregion, kan me tapa kampen mot Bergen om folk og pengar, seier regionlensmann Arne Johannessen i Sogn (t.v.) og får støtte frå kollega i Nordfjord, Tormod Hvattum (t.h.), medan regionlensmann Dag Fiske (midten) i Sunnfjord meiner éin region vil gi best polititenester.
Bergen versus distrikta
– Dette handlar mellom anna om kor mange som skal sitja rundt bordet til politimeisteren. Der er det viktig å ha politileiarar utanfor Bergen by, for å få inn eit breiare perspektiv, sa regionlensmann i Sogn, Arne Johannessen, i oktober.
Ordførar Ola Teigen i Flora trur ikkje tre regionlensmenn frå kvar sine små einingar vil ha særleg gjennomslag, og han er heller ikkje sikker på om dei faktisk vil stå skulder ved skulder:
– Eg trur ikkje tre regionlensmenn vil vera opptekne av Sogn og Fjordane. Dei kjem til å kjempa for pengar og politifolk til si eining, og vil ikkje tenkja heilskapleg når det gjeld ressursar til Sogn og Fjordane.
