Snubla over ekstremfart i narkosak

– Det er snakk om fart opp i 240 km/t på den eine og 220 km/t på den andre. Dette er overhovud ikkje bra, seier etterforskingsleiar Stine Mari Vårdal hos politiet i Sunnfjord.

Dei to mennene i 20-åra erkjende straffskuld og samtykka til at politiet fekk hand om førarkortet.

Det blir ikkje feil å seie at politiet regelrett snubla over videoane. For videoane dukka opp på mobiltelefonar beslaglagde i samband med ei større lokal narkotikasak.

Trur det er «skrytevideoar»

Mennene hadde filma seg sjølve i køyresituasjonane. Begge i tunnelar, der fartsgrensa er kring ein tredel av farten på videoane – 80 kilometer i timen.

Vårdal trur videoane er sokalla «skrytevideoar», som vart både lagra og delte med andre.

– Dette er veldig alvorleg. Ein ville aldri overlevd krasj i ein slik fart, seier Vårdal.

Sjef for Utrykkingspolitiet, Jon Steven Hasseldal, seier det høyrer med til sjeldanheita at ein høyrer om slike fartsoverskridingar.

Han meiner at skrytevideoar er eit problem.

– Det kan igjen motivere andre til å gjere det same, fryktar han og minner om at:

– Fart er ei medverkande årsak til 41 prosent av alle dødsulukkene her til lands, og når ein køyrer i slik fart utset ein seg sjølv og andre vegfarande for svært stor risiko. Det er berre flaks at det går bra, seier han.

Stikk av frå politiet

NRK har tidlegare omtala ungdom som deler skrytevideoar der dei råkøyrer og stikker av frå politiet. I 2018 vart ein ung nordlending, som filma eiga villmannskøyring , dømd til fengsel i 60 dagar. Han vart også frådømd førarretten i 48 månader.

– Dette er veldig grove tilfelle som vil føre til tap av førarretten i over 36 månader, og ei vilkårslaus fengselsstraff, avsluttar UP-sjefen om den aktuelle saka i Sunnfjord.