Pengar til E39 og Loftesnesbrui

Sogn og Fjordane skal få sin del av kaka til samferdsel i statsbudsjettet som vert lagt fram måndag.

Kommunalminister og Senterpartileiar Liv Signe Navarsete stadfestar ei rekkje prosjekt til NRK Sogn og Fjordane.

• LES OGSÅ: Lover tidenes transportløft

Det er fyrst og fremst E39 som skal rustast opp, men også riksveg 5 i Sogndal får sitt, der det skal byggjast ny Loftesnesbru over fjorden. Det er 54 år sidan den eksisterande brua vart opna for trafikk og erstatta ferja som gjekk over sundet.

• Les artikkelen Ferje og bru over Loftesnessundet i Fylkesleksikonet.

Held fram på E39

Arbeidet med å ruste opp ferjekaiene på E39 i fylket held også fram. På Anda skal arbeidet gjerast ferdig, medan kaien på Oppedal skal opprustast. I Lavik skal det til neste år byggjast ny feriekai, oppstillingsplass og tilkomstveg til 95 millionar kroner.

- Arbeidet på strekninga Torvund – Teigen (mellom Lavik og Vadheim, journ. mekr.) held fram. Men det blir også starta opp arbeid på to parsellar på E39 i Gaular, på strekninga Dregebø – Sande. Her er det sett av 20 millionar kroner i startløyving. Anleggsarbeidet skal starte i februar 2013, opplyser statsråden.

Førdepakke og Filefjell

Ho fortel vidare at det kjem planleggingsmidlar til både Førdepakken, og til opprusting av E39 langs Jølstravatnet.

- Dessutan skal arbeidet med opprusting av E16 over Filefjellet halde fram, med 140 millionar kroner på budsjettet i 2013, seier Navarsete.

Arbeidet på strekninga Smedalsosen-Maristova-Borlaug skal vere ferdig i 2014. Prosjektet omfattar omlegging og opprusting av ein 11 kilometer lang strekning. Blant anna skal fire rasutsette punkt skal fjernast.

- Trist ulukke

I Sogndal har dei i ei årrekkje kjempa for å ny Loftesnesbrua. Der kjem det no pengar til å starte arbeidet med å byggje ny bru. I første omgang er det sett av 10 millionar kroner. Bygginga av den nye brua skal starte våren 2013, og den skal stå ferdig til 2015.

- Det kjem ei startsløyving på Loftesnesbrua i Sogndal, der det nyleg har vore ei trist ulukke. Det er viktig å få sikra den brua for syklande og gåande, seier Liv Signe Navarsete.

• LES OGSÅ: Bilførarar er fråteken førarkortet
• LES OGSÅ: Skal ha møte om ulukkesbrua