Blir ikkje feilen retta, kan det bli aktuelt å stogge turbinane, skriv NVE i brevet som er sendt til vindkraftselskapet Falck Renewables Wind.
I førre veke fortalde NRK at innbyggjarane i Berle i Bremanger kommune fekk TV-signala forstyrra av vindkraftverket på Hennøy.
Isak Berle, som bur i bygda, fortel at dei har hatt problema sidan midten av desember.
Anten har dei ikkje hatt signal i det heile teke, eller så har det vore eit frose bilete på skjermen så lenge turbinane går.
– Vi hadde jo ikkje rekna med at TV-signala skulle bli påverka. Vi forstod ikkje heilt kva det var til å byrje med, seier han.
MISTA SIGNAL: Isak Berle krev at vindkraftselskapet ryddar opp i problema slik at han og naboane får sjå TV igjen.
Foto: Bård Siem / NRK– Krava er tydelege
NVE sende brevet til vindkraftselskapet i førre veke. Der viser NVE til målingar som syner at Hennøy vindkraftverk forstyrrar TV-mottaka i Berle og Sørgulen.
Etaten krev difor at selskapet innan 20. februar presenterer ein plan for korleis dei skal løyse problema.
Fungerande seksjonssjef Anne Johanne Kråkenes i NVE ønskjer ikkje å gå i inn på kva dei vil gjere om planen ikkje kjem eller om dei meiner tiltaka ikkje er gode nok.
– Burde ikkje desse krava vore stilte før vindturbinane vart bygde?
– I samband med konsesjonsbehandlinga vart det vurdert som lite sannsynleg at radio- og TV-signala ville verte påverka. Men vi sette som vilkår om dersom det likevel syner seg å vere eit problem på eit seinare tidspunkt, skal det setjast i verk tiltak, seier Kråkenes.
– Vi lovar å ordne opp
Ifølgje brevet har Falck Renewables allereie sagt dei vil kome opp med tiltak som kan løyse problema med manglande TV-signal.
Dei har alt denne veka avtalt møte med Norges Televisjon, som står for utbygging og drift av det digitale bakkenettet. Møtet skjer på torsdag.
– Falck Renewables vil innfri krava i konsesjonen, og det inkluderer kravet i denne saka. Vi har vore i kontakt med både NVE og Norges Televisjon, og forsikra dei at vi tek dette på alvor, skriv Scott Gilbert, sjef i Falck Renewables Vind, i ein e-post til NRK.
Isak Berle er glad for utviklinga i saka og håpar problema blir løyste.
– Det er på høg tid at NVE vaknar i desse sakene. Eg har fått fleire telefonar frå andre område i landet som slit med dei same problema. Det er kjekt å høyre at dei byrjar å sjå på kva som skjer.
- Les også:
- Les også: