Nominerte, publikum og bransjefolk strøymer no inn i det flotte kulturhuset ved sjøkanten midt i Stavanger. Tre av dei fire nominerte frå Sogn og Fjordane er no på plass.
–Eg gler meg noko heilt enormt til i kveld. Dette har eg drøymt om sidan eg var born. No har vi hatt generalprøve, og eg kosar meg veldig. Sjølv om det sjølvsagt er masse nervar som skal haldast i sjakk også, men dette er berre spennande å få vere med på, seier Thea Hjelmeland på den raude løparen framfor inngangen til Spellemann 2014.
Kjolen til Thea vart ferdig
Ho har nytta natta til å sy kjole til festkvelden. Den vil TV-sjåarane få sjå uansett om det blir pris eller ikkje til Thea Hjelmeland. Ho skal nemleg framføre låten "Feathery" under sjølve utdelinga.
– Kjolen er no ferdig, og har delvis blitt limt på meg backstage, så no skal det meste vere klart. Vi sydde kjole til klokka 05 i dag tidleg, seier Hjelmeland som er tydeleg spent på kvelden.
- Les også:
- Les også:
- Les også:
Kan få to Spellemenn
Thea Hjelmeland frå Førde kan bli tildelt Spellemannspris for plata "Solar Plexus", både i klassa for "Indie" og som beste tekstforfattar. I kampen om tittelen som beste tekstforfattar konkurrerer Hjelmeland saman med Highasakite, Marit Larsen, Siri Nilsen og Sondre Lerche. I kategorien "Indie", er Bendik, Dark Times, Thea & The Wild med i kampen.
Nervane under kontroll
Også saksofonisten Karl Seglem kan stikke av med ein pris, i kategorien "jazz" med albumet "Som Spor." Han kjempar om prisen saman med "In The Country, Solveig Slettahjell, Bugge Wesseltoft, Knut Reiersrud", Jan Gunnar Hoff, Marius Neset/Trondheim JazzOrchestra og Ola Kvernberg.
– Eg gler meg noko enormt. Dette blir ein veldig spennande og stor kveld, seier Karl Seglem på veg oppover den raude løparen.
Han har gjort klar takketalen dersom han skulle vinne ein pris i kveld, og har så langt nervane under kontroll.
Fylket kan ta fem prisar
Den yngste av artistane frå Sogn og Fjordane som kan få ein Spellemannspris i kveld er Martin Tungevaag frå Stad. Han kjempar om ein pris for beste låt, saman med Emilia for songen "Samsara 2015". Arve Henriksen frå Stryn er også nominert i "Open klasse" for albumet "Fly North." Henriksen er på turne i utlandet, og kan difor ikkje vere i Stavanger i kveld. Totalt er det fem prisar artistar frå Sogn og Fjordane kan hente med seg heim frå Stavanger i kveld.