Laurdag kveld vart Luttprisane delt ut direkte frå Kviknes hotell i Balestrand.
Line Dybedal vart årets artist, Oddny vart årets nykommar. Stian Sjursen Takle vart årets eldsjel og Oddvar Torsheim fekk heidersprisen.
Det er 18. gongen at desse prisane vart delt ut til artistar frå Sogn og Fjordane. Tidlegare har artistar som Eva Weel Skram, Sigrid Moldestad og Kjartan Lauritzen fått denne prisen.
I år vart Luttprisen arrangert på Kviknes Hotel i Balestrand saman med gjengen på Balestrand hotell, NRK Vestland og produksjonsselskapet OnCue.
Line vart årets artist
Juryen seier at årets artist, Line Dybedal, har ein sterk musikalsk identitet, og har i mange år vore blant dei fremste i fylket i sin sjanger. Som soloartist har det blitt tre album og nesten tre dusin singlar, det nyaste albumet kom i 2023.
Oddvar Torsheim fekk heidersprisen
Det vart også delt ut ein ekstraordinær pris i år. For andre gong vart Lutt sin heiderspris delt ut. Tidlegare er det berre Olav Stedje som har fått denne prisen. Men laurdag kveld fekk Oddvar Torsheim den andre heidersprisen.
Juryen seier at Torsheim er ein av våre fremste kunstnarar, men har også stått fram med eit unikt musikalsk uttrykk gjennom fleire tiår. Han har følgt Luttprisen frå starten, og stått på scena mange gonger. Det siste året har han feira 85-årsjubileum og endeleg fått opna sitt eige galleri i Kalvåg. Han vart overraska med både pris og Roger Pettersen si tolking av låta si «Galningen.»
Oddny vart årets nykomar
Juryen seier Oddny på kort tid har posisjonert seg som eit band med kvardagslyrikk på dialekt som sitt varemerke. Dei har utmerka seg med sine enkle, men treffande skildringar av både det nære kystlandskapet og storbyen sine mange utfordringar.
Saman med ein fagjury er det publikum som avgjer kven som får tildelt Luttprisen. Det kom inn nesten 16.000 røyster til dei nominerte til prisane i år.
Årets eldsjel vart Stian Sjursen Takle
Musikkorganisasjonen Brak har stått for denne prisen og juryen seier at vinnaren har over mange år vist eit brennande engasjement for musikk. – Frå sin sentrale posisjon i NRK har vinnaren konsekvent framsnakka og jobba ekstra for at musikk og musikarar i alle aldrar skal nå ut til så mange som mogleg.
– Vinnaren har gjennom systematisk innsats og gjennom mange samarbeid reda grunnen for scener og arena der spesielt unge musikarar og artistar frå gamle Sogn og Fjordane fylke har fått moglegheita til å ta ei ekstra steg vidare i karriera og i musikkbransjen.
Høyr sendinga frå utdelinga her:
Les også: