Miguel har vore singel nesten heile livet – har aldri sakna å ha ein kjæraste

– Eg kan heilt ærleg seie at eg aldri i mitt liv har følt meg einsam. Aldri.

Miguel-Angel Fernandez (44) sit i leilegheita si.

Ein liten, men koseleg eittroms i Oslo sentrum.

Her har han plass til det han treng.

Seng, sofa, hylle med bakeutstyr og keyboard.

Sjølv om han bur aleine, føler han seg ikkje aleine.

Ein viktig forskjell.

– Eg er singel, men ikkje aleine.

Det seier Miguel, som for tida er å sjå i «Bakemesterskapet».

Musikalartisten og koreografen bruker mykje tid på det han synest er viktig:

Familie og venner.

Alle dei gode menneska han har rundt seg gir han den kjærleiken han har behov for, sett bort frå det intime i eit forhold.

Mange single i Noreg

Miguel er ikkje aleine om å leve utan ein partnar.

Det har aldri før vore så mange nordmenn som bur aleine.

I 2023 var det 1,05 millionar personar, ifølge SSB. For ti år sidan budde rundt 864.000 aleine.

Den viktigaste årsaka er befolkningsvekst og at fleire blir eldre.

– Ei anna årsak kan vere at fleire unge ventar lenger med å etablere seg i parforhold, seier seniorrådgivar i SSB Espen Andersen.

Fordeler ved å vere singel

Nokre bur aleine frivillig, nokre ufrivillig.

– Har ein tette band med familie og venner, kan ein føle eit mindre behov for ein partnar.

Det seier samlivsekspert Frode Thuen.

Han fortel at mange opplever det å vere singel som noko fint.

Enten ein aktivt har valt det eller ein ikkje har funne nokon enda.

– I staden for å sjå på singellivet som ein uønskt situasjon, vel mange å sjå på gledene og fordelane.

Opplever fordommar

Trass i at det er meir normalt å vere singel, får Miguel i blant spørsmål om kvifor han ikkje har ein partnar.

«Du som er ein så likandes fyr, du bør ha ein kjærast»

– Kvifor må eg det? Eg forstår ikkje heilt kvifor det er så sinnssjukt viktig.

Han føler iblant det ligg ei forventning om å vere i eit forhold, og at nokre ikkje forstår at ein kan ha eit lykkeleg liv utan ein partnar.

Thuen fortel at det ligg i kulturen vår.

Sjølv om det nå er meir normalt å vere singel i heile eller delar av livet, eksisterer fordommane enda.

– Vi følger ein oppskrift. Når ein blir vaksen skal ein finne ein partnar og få barn. Det å vere sjølvvalt singel bryt med norma, seier samlivseksperten.

Alltid plass til meir kjærleik ❤️️

Sjølv om Miguel ikkje aktivt søker etter ein partnar, er han open for å få seg ein kjærast i framtida.

Først må han treffe den rette.

– Eg har allereie masse kjærleik i livet mitt, men eg har plass til litt til.