– Eg tenkte veldig mykje på korleis andre såg på meg.
Kristoffer Skår Lone fortel om då han som 18-åring starta med styrketrening.
Han ville bli større og sterkare.
Han ville ha respekt frå andre gutar og merksemd frå jentene.
– Eg hadde ein del usunne tankar om kor viktig den sosiale statusen var, seier Lone, som i dag er 24 år.
Dei fleste unge i dag har det bra. Det viser Ungdata-undersøkinga som kjem kvart tredje år.
Men samstundes er kroppspress noko dei fleste ungdommar opplever.
Også gutar.
Nyleg fortalde Lone historia si ein skrivekonkurranse arrangert av Bergens Tidende og studentavisa Studvest.
For han var det ikkje eit press frå andre om å bygge større kropp.
For dei rundt han har alltid vore snille.
– Kroppspresset følte eg kom frå meg sjølv. At eigenverdien min avhang av at eg klarte å presse meg sjølv, seier han.
Han følte seg som eit uferdig prosjekt, og det var ikkje aktuelt å skeie ut i verken treninga eller matvegen.
Meir vekt på det ytre
Utviklinga er at ungdom legg stadig meir vekt på det ytre.
Ungdomsforskar Ingunn Marie Eriksen ved OsloMet peikar på at det er to faktorar som påverkar den opplevde eigenverdien til ungdom.
Først er det sjølve kravet om å sjå ut på ein bestemd måte.
Det andre er arbeidet ein må legge ned for sjå sånn ut.
Men når ein speglar sin eigen kropp opp mot det som er det kroppslege idealet, vil ein alltid tape.
– Og konsekvensen av det er at ungdommane kan sjå på seg sjølve som ikkje bra nok, forklarar ungdomsforskaren.
NRK har tidlegare skrive om at det ikkje er nok kunnskap om kroppspress blant gutar, at Medietilsynet er bekymra og at marknadsføring kan føre til både kroppspress og kjøpepress.
Fekk vondt av treninga
Kristoffer Skår Lone fekk merksemd då han blei større og sterkare.
Men etter kvart begynte all treninga å slite på kroppen.
Både psykisk og fysisk.
Frå dei som var han nære fekk han kritiske spørsmål om kva han dreiv på med.
NRK har vore i kontakt med fleire gutar om trening og krava som blir sette for å oppnå idealkroppen. Ein av dei er tiandeklassingen Edvard Aamot frå Førde.
Han fortel at han har vener som har følt at trening har gjort dei slitne.
– Dei har ikkje orka, eller så har dei nesten slutta, seier han.
Ein einaste stor egotripp
For Kristoffer Skår Lone blei løysinga å ta eit kritisk oppgjer med seg sjølv.
Han innsåg at den overdrivne treninga hadde blitt ein usunn egotripp.
Og no har han tatt eit oppgjer med sitt 18-årige «eg».
Skår Lone ber unge i dag om å vere sjølvstendige.
– Spør deg sjølv om kor du eigentleg vil i livet, og ta val deretter.