– Eg meiner at denne avtalen vi har fått til, er ein avtale som gir begge kommunane ei god moglegheit til å utvikle seg, seier ordførar i Gloppen, Leidulf Gloppestad frå Senterpartiet.
Avtalen vart måndag lagt fram for kommunestyra i dei to kommunane for vidare handsaming, skriv dei i ei pressemelding.
Forhandlingsutvala i Eid og Gloppen er altså samde om å inngå ein intensjonsavtale om samanslåing av dei to kommunane til éin ny kommune frå 1. januar 2020. Den nye kommunen vil då få namnet Nordfjord kommune.
– Det er ikkje slik at eidarane skal gjere glopparar av seg og omvendt. Poenget er å utvikle ein større region. Målet er å skape større og gode fagmiljø som er attraktive å jobbe i og gir trygge og gode tenester i framtida. Og ikkje minst handlar det om å bli ei felles kraft for samfunnsutvikling og næringsutvikling, seier Eid-ordførar Alfred Bjørlo frå Venstre.
– Skal vi få til vekst og utvikling må vi vere sterkare. Det handlar om å byggje ein sterk og samla kommune i midtre Nordfjord, legg han til
- Les også:
Sandane som kommunesenter
I intensjonsavtalen legg dei vekt på at tenestene i den nye kommunen, som barnehagar, skular og eldreomsorg, skal ytast desentralisert slik som i dag.
Dei administrative oppgåvene vert fordelt mellom Nordfjordeid og Sandane:
Sandane (Heradshuset):
- Ordføraren og rådmannen med stab
- Kultur- og nærings-/landbruksavdelinga
- Servicetorg
Nordfjordeid (Eid Rådhus):
- Skule- og oppvekst
- Helse- og omsorgsadministrasjon
- Planavdeling
- Servicetorg
Sandane får difor status som kommunesenter.
– Begge kommunane ønskte å ha status som kommunesenter og få ordførar- og rådmann-plassering i den nye kommunen, men for at vi skulle komme i mål og finne ei god løysing måtte vi få ei mest mogleg likeverdig fordeling mellom dei to kommunane. Dermed enda vi opp med denne modellen, seier Bjørlo.
– Eg føler vi har funne ei god løysing. Så dette er ein siger for oss begge, seier Gloppestad.
Dei som jobbar i kommunane i dag er blitt lova at dei får behalde jobb i kommunen, men må vere førebudde på at her kan det komme nye oppgåver og arbeidsstad.
GÅR SAMAN: Eid-ordførar Alfred Bjørlo (V) og Gloppen-ordførar Leidulf Gloppestad (Sp).
Foto: Silje Guddal / NRKTja...
Ved ei samanslåing vil den nye kommunen ha om lag 12.000 innbyggjarar og bli blant dei tre største kommunane i Sogn og Fjordane.
Målet er å bli eit regionalt tyngdepunkt i Nordfjord på linje med Førde og Sogndal, men sjølv om intensjonsavtalen no er forhandla fram, er ikkje alle folkevalde like overtydde.
– Eg synest dei har gjort eit godt arbeid, men eg er framleis ikkje overtydd om at eg vil ha ein samanslegen kommune. Vi i Gloppen SV gjekk til val på at vi ønskjer at Gloppen skal vere ein eigen kommune, seier kommunestyremedlem Hege Lothe.
I Eid har Sigurd Reksnes og Sp vore blant skeptikarane. I dag la han seg på ein mindre avvisande tone.
– Eg har glad for at vi har fått ein konkret avtale på bordet. No vil vi vurdere den internt i gruppa, og vi vil ha medlemsmøte. Eg ser fordelar med storkommunen, men eg har heile tida vore skeptisk til kommunereforma, seier Reksnes til NRK.
- Les også:
- Les også:
Realisering av fjordkryssing
Eit av hovudmåla for etablering av den nye kommunen er å raskt få realisert ei bru mellom Anda og Lote for å binde saman den nye kommunen.
– Eit premiss for at vi går saman er at det skal komme ei bru i framtida. Skulle vi komme i ein situasjon i framtida der vegane vert lagt om, så er ikkje denne kommunen berekraftig. Vi går saman i tru på at brua kjem, seier Bjørlo.
Dei har også eit mål om å få lokalisert minst éi større statleg etatseining innan 2021.
Planen er mest truleg å ha ei rådgjevande folkerøysting om samanslåing i mai, før ein gjer endeleg vedtak i kommunestyra i juni
