I ei ny vending om den like omstridde som stupbratte klatreløypa på «Nord-Europas høgaste sjøklippe», har staten kjent det kommunale vedtaket om å avgrense tilgangen for ugyldig.
Det er gjort «feil ved rettsutøvinga» som «kan ha verka bestemmande på innhaldet i vedtaket», skriv Statsforvaltaren i Rogaland.
Dei konkluderer:
– Statsforvaltaren opphevar kommunen sitt vedtak.
Det var i fjor sommar at kommunen stengde «den mest spektakulære via ferrataen i Noreg» for allmenn bruk – på tvers av den «heilage» norske allemannsretten.
– Vi meiner dette er lurt i ein oppstartsfase, sa ordførar i Bremanger, Anne Kristin Førde (Ap) i mai i fjor.
Etter opninga i juni i fjor måtte difor alle klatrarane reise med guide og betale enten 1495 kroner for ein tur på fem timar som tek deg halvvegs, eller noko meir for ein tur på 7–8 timar som tek deg heilt til toppen.
– Denne via ferrataen er den brattaste eg veit om, og eg trur vi gjer lurt i å tenke sikkerheit før vi gjer ho til allmenn ferdsel.
– Må følge vedtaket
Fleire organisasjonar og enkelpersonar klaga på kommunen sitt vedtak, blant dei Norges Klatreforbund.
I dag er styremedlem Odd Magne Øgreid letta.
– Vi er tilfredse med at utestenginga av allmenta er oppheva slik at fjellet er opna for fri ferdsel igjen.
For mange klatrarar har vedtaket til kommunen vore uhaldbart, ettersom ruta kjem i konflikt med andre klatreruter på Hornelen. Den bratte fjellsida ut mot havet er eit ynda klatremål for erfarne klatrarar.
Øgreid kjem no med ei klar oppfordring til korleis Bremanger kommune skal løyse den nye situasjonen.
– Dei må informere tydeleg om kva kompetanse som må til for å gå ruta. Og gjerne sette opp ei god informasjonstavle der klatreruta startar.
Han viser til at i norsk natur er alle ansvarlege for eigen tryggleik, men det krev at ein har nok kunnskap.
Betre skilting
Ordføraren i Bremanger er tydeleg på at ho tek Statsforvaltaren sitt vedtak til følgje. Det betyr at det må bli betre skilting for alle som vurderer å gå ruta denne sommaren.
– Vi må skilte og vere tydelege på det er ei løype som er unik. Det er ikkje for kven som helst å gå opp, seier Anne Kristin Førde.
Ho ønsker å unngå ein sommar med mange ulykker og redningsaksjonar.
Førde utelukkar likevel ikkje at kommunen vil sjå nærare på heile reguleringsplanen for området.
Med ei anna regulering så kan det også bety ein «omkamp» på om allmenta skal ha tilgang eller ikkje.
– Vi ser på moglegheita, stadfestar ordføraren.