Høgskulen skal utvikla dei beste fotballtalenta

Før kampen mellom Sogndal og Florø, vart Bakkeplassen offisielt opna. Sittekroken er til minne om Svein Bakke, sogndallegenda som gjekk bort i 2015.

På opninga delte Svein Bakke sitt minnefond også ut sitt første stipend. 450.000 kroner gir dei til eit prosjekt der Høgskulen på Vestlandet, dei tre toppklubbane i Sogn og Fjordane og fotballkrinsen skal samarbeida om talentutvikling.

– Ikkje breiddefotball

– Det kan bli diskusjon av dette, for her må me satsa på dei beste. Dette er ikkje breiddefotball, seier Ingvar Stadheim, styreleiar i Svein Bakke sitt minnefond.

Høgskulen samarbeider allereie med Sogndal Fotball om forsking og utdanning innan fotball. No skal dei også samarbeida om utviklinga av talent, saman med Kaupanger, Florø og fotballkrinsen.

Målet er å laga ein god treningskvardag for dei beste talenta i Sogn og Fjordane i alderen 13–16 år. Sjølv om prosjektet er heilt i oppstartsfasen, ser Høgskulen for seg ei tett oppfølging av spelarane krinsen reknar som dei største talenta. Dei vil til dømes:

• Sjå på treningsbelastinga til spelarane.
• Finna ut kor mykje og kor hardt dei trenar.
• Laga fleire samlingar utover dei krinsen allereie tilbyr
• Testa og kartlegga spelarane
• Undersøka viljestyrke og motivasjon
• Undersøka «fotballhovudet» deira
• Måla ferdigheiter og utvikla spisskompetanse

– Me kan hjelpa spelaren å ha ein tilrettelagt treningskvardag. Men spelaren må villa dette, foreldra må villa dette og klubben må villa dette, seier Stadheim.

Forsking og analyse

– Det er i hovudsak eit utviklingsprosjekt der me ønskjer å stimulera til meir og betre aktivitet hjå dei beste spelarane, seier Vegard Fusche Moe, forskingsprogramleiar ved Høgskulen på Vestlandet.

– Men sidan Høgskulen er med i prosjektet, så ønskjer me også å driva forskingsarbeid på det. Det vil handla om å dokumentera dei fysiske sidene, dei mentale sidene og prøva å koma fram til ny kunnskapsutvikling på feltet, held han fram.

Sogn og Fjordane fotballkrins håpar prosjektet vil gi meir kvalitet i talentarbeidet dei allereie gjer.

– Det er først og fremst teknologi og forsking. Det er mykje synsing i fotball. Me syns me har trena hardt, men så er det ikkje sikkert me har det. Me er opptekne av å få dokumentert mest mogleg, seier Jan Tore Jåstad, spelarutviklar i Sogn og Fjordane fotballkrins.

• Les også: To klubbar på kanten

– Talent er mangelvare no

Då Sogndal selde det unge, lokale talentet Johan Hove (17) til Strømsgodset førre veke, vart det mykje diskusjon rundt Sogndal Fotball sin lokale profil og satsing. Sogndal-trenar Eirik Bakke håpar dette prosjektet vil gjera at fleire talent tek steget opp til dei største fotballscenene i fjordfylket.

– Det er litt mangelvare nett no, men det kjem mange gode talent. Då er det viktig at me legg til rette for at dei skal få ein moglegheit til å koma så langt som mogleg. Dette vil bidra til det, seier han.