Her testar Hildur (85) hundesledekøyring for aller første gong

SOGNDAL (NRK): Reiselivsnæringa vil lokka fleire vinterturistar til fjells: - Dette kan eg tenke på når eg vert gammal, seier Hildur Dvergsdal (85).

Kenzo Djiksterhuis og Hildur Dvergedal

FØRSTE TUR: Kenzo Djiksterhuis tar Hildur Dvergedal med på tur i fjelltrakter ho er glad i. Det er første gong 85-åringen prøver hundesledekøyring.

Foto: Ragnhild Myklemyr / NRK

Ein snødekt fjellheim omgir Hildur Dvergedal i Hodlekve i Sogndal. Ti ivrige Alaska Husky-hundar har frakta henne til ein fjellheim ho er glad i.

– Du kvir deg ikkje for litt fart og moro?

– Nei, kvifor skal ein det? spør ho smilande tilbake.

Dvergedal er den første til å prøve ut den nye satsinga innanfor vinterturisme i Sogn.

Hundesledekøyring, Hodlekve

MINNE: – Det er ein dag eg skal minnast, det er heilt sikkert, seier Hildur Dvergedal (85).

Foto: Ragnhild Myklemyr / NRK

Vil satse på sledekøyring

Reiselivsnæringa ønskjer seg fleire turistar heile året. Skidestinasjonen Hodlekve i Sogndal veks både når det gjeld tal hytter og aktivitetar. Nederlendaren Kenzo Djiksterhuis ønskjer å tilby noko nytt som kan få fleire til fjells.

– Eg har jobba med hundesledekøyring og turistar i åtte år. Det er ei oppleving eg vil tilby fleire, seier han.

Ved Sogndal Skisenter har han fått på plass hundegarden. Han meiner forholda ligg godt til rette for hundekøyring i området, og trur det lar seg gjere å dele fjellheimen med skigåarar.

– Vi har fjell og mykje snø, og det er vakker utsikt her. Det er perfekt, seier Djiksterhuis.

#NRKVestland - Hildur Dvergedal frå Sogndal er 85 år gamal. Det skremde ho likevel ikkje frå å bli med husky-tur! Sjå...

Publisert av NRK Vestland  Fredag 7. februar 2020

Nye målgrupper

Dagleg leiar Per Odd Grevsnes ved Sogndal Skisenter håpar tilbodet kan nå nye målgrupper.

– Det er kjempespennande. Det gir eit tilbod til ei gruppe som kanskje ikkje er så glad i å gå på ski eller av ulike grunnar ikkje kan gå på ski, seier han og held fram:

– Vi må ta innover oss at det kan bli brukarkonfliktar, til dømes med hundeskit i løypene og litt bråk. Men eg trur det er minimalt sett opp imot gevinsten vi får, seier Grevsnes.

Hundane har fått ein pause i fjellheimen. Hildur Dvergedal knipsar bilete av huskyane og landskapet rundt seg.

Ho fortel at opplevinga har vore eit eventyr og anbefaler fleire å prøve hundesledekøyring.

– Det er ein dag eg skal minnast, det er heilt sikkert, seier 85-åringen.

Hildur Dvergedal testar hundesledekøyring på Hodlekve

EI OPPLEVING: 85-åringen fekk god kontakt med huskyane.

Foto: Ragnhild Myklemyr / NRK