Eit heilt spesielt fartøy treffer vatnet på Eidsfjorden. Etter mange års arbeid, er det endeleg tid for at det nybygde Myklebustskipet kan sjøsettast.
Myklebustskipet er truleg det største vikingskipet det er funne restar etter i Noreg. Ingen veit nøyaktig korleis båten såg ut fordi vikingane brann båten opp i ei grav, men rekonstruksjonen gir eit inntrykk av dei veldige dimensjonane på båten.
Det nye Myklebustskipet er kring 30 meter langt og veg over 14 tonn. 24 par årer må til for å få fart på sjøen.
– Kraftig løft for reiselivet
Skipet blir midtpunktet i opplevingssenteret Sagastad, som opnar på Nordfjordeid 10. mai. Når også dei første cruisebåtane kjem til kommunen denne sesongen, er det venta at skipet blir ein av dei viktigaste attraksjonane.
– Myklebustskipet og opplevingssenteret på Sagastad vil bli eit av dei store trekkplastera i fjordnoreg for dei som er interesserte i vikinghistorie. Dette er den første store attraksjonen som løftar fram vikingtradisjonane på Vestlandet, seier ein tydeleg stolt ordførar Alfred Bjørlo (V).
– Eit smykke
Sjølv har han følgt bygginga av skipet og senteret. Og han har late seg imponere.
– Eg vert aldri leie av å sjå på det. Det er så flotte former. Og då eg kom ned hit i dag tidleg og fekk sjå skipet for første gong med drakehovud gav det eit mektig inntrykk. Det er jo eit smykke, seier Bjørlo.
Starta arbeidet i 2016
Det originale Myklebustskipet høyrde til Kong Audbjørn av Fjordane som fall ved Solskjel på 800-talet. Skipet brann opp saman med eigaren i ein gravhaug på Nordfjordeid.
Arbeidet med ein rekonstruksjon av fartøyet starta vinteren 2016. Båtbyggjarar frå bygda Bjørkedalen på Sunnmøre har lagt ned mange timar arbeid for å reise det nye Myklebustskipet.
Storleiken på båten er rekna ut frå storleiken på naglane, og antalet skjoldbular som vart funne i skipsgrava.
I følgje båtbyggjar Ottar Kåre Bjørkedal har seks mann jobba med skipet i tre vintrar. Mellom 10 000 og 12 000 arbeidstimar har dei brukt på jobben. Laurdag står i han i sjøkanten og følgjer spent med på det som skal skje snart.
– Det er ein spennande dag. Det er mykje å tenkje på, og som kan gå gale. Men til no har det gått bra. Når båten flyte kan vi puste letta ut. Det er ein god dag som vi har sett fram til i tre år, seier han.
Dåp søndag
Skipsdåpen skjer søndag, då kjem kulturminister Trine Skei Grande (V) til Nordfjordeid for å vere gudmor for det nye Myklebustskipet.