Denne roboten gjer historiske funn for arkeologane

Den kan minne om ein farkost frå ein Star wars-film, den knallraude krabaten som rullar sakte, men sikkert over Heimdalsjordet i Sandefjord.

Vi er på historisk grunn.

Her er det tidlegare påvist spor etter ein marknadsplass frå vikingtida, og berre nokre hundre meter nordover ligg den berømte Gokstadhaugen.

Arkeologane Lars Gustavsen og Erich Nau frå NIKU følger spent med på ein skjerm frå sidelinja.

Dette er topp moderne skattejakt, og den rullande firehjulingen ute på jordet gjer grovarbeidet.

God hjelp

Roboten består i all hovudsak av to komponentar.

Ein sjølvkøyrande, raud firehjuling, og eit georadarsystem i ein kvit boks, festa på undersida.

Slik kan arkeologane gjere søk under jordoverflata.

– Dette er ein metode vi bruker for å samle data om undergrunnen. For vår del hjelper den oss med å kartlegge viktige geologiske strukturar, forklarer Nau.

Det er snart 15 år sidan arkeologane undersøkte Heimdalsjordet sist.

Den gong brukte dei gammalt utstyr.

– I vikingtida gjekk sjøen nesten heilt opp til dette jordet, som gav ei naturleg beskytta hamn, seier Nau.

Ved førre undersøking blei det funne minst 25 hus, og fleire gravhaugar. Dei ligg framleis under bakken.

– På denne måten kan vi finne meir og få betre arkeologi, seier eksperten.

Får svar på direkten

Arkeologane bruker to maskiner i arbeidet.

På den første skjermen kan ein sjå ruta til roboten på jordet.

Den andre viser data som doningen finn på ferda si.

– Dette utstyret gjer det langt enklare å sjå viktige detaljar i etterkant, forklarer han.

– Har de håp om å finne noko spennande?

– Nå testar vi først og fremst utstyret på eit område vi kjenner godt frå før, men at han kan gjere viktige funn andre stader er heilt sikkert, meiner arkeologen.