Ifølgje avtroppande Lærdal-ordførar Jan Geir Solheim (Sp) er førespurnadene om anløp neste sommar alt komne frå reiarlaga, skriv Sogn Avis.
– Vi hadde ein diskusjon om dette for litt over to år sidan. Då hadde vi ikkje nok infrastruktur på land på plass. No er det nye moglegheiter, seier Solheim til NRK.
Han viser til at det går mot eit politisk skifte, og at det må vere fleirtal og vilje til ei cruisesatsing der.
– Så må vi gjere nokre tiltak på kaia, dei er ikkje store, seier Solheim.
– Er vi framoverlente kan dette skje frå neste sommar.
Vil ikkje bli nytt Flåm
Solheim meiner potensialet er stort for Lærdal, men seier dei ikkje ønskjer å bli eit nytt Flåm.
– Vi må behalde vår eigenart. Eg trur vi kan ta imot ein del skip, men i første omgang ikkje på linje med Flåm, seier Solheim.
I Hjørundfjorden i Ørsta i Møre og Romsdal vender dei tommelen ned til cruiseskip og masseturisme.
– Finst det grunnar til å ikkje ønske cruisetrafikk til Lærdal?
– Eg ser det ikkje slik. Vi hadde cruisebåtar til Lærdal før, og det fungerte fint. Spørsmålet vi må stille er korleis vi får turistane til å vere i Lærdal sentrum og bruke tilboda der på dagtid.
Han ønskjer at turistane skal bruke kafeane, butikkane og attraksjonane i Lærdal.
Må sjå på heile regionen
Samarbeid i regionen er viktig dersom det skulle bli aktuelt med cruiseturisme i Lærdal, påpeiker reiselivsdirektøren i Visit Sognefjord, Ståle Brandshaug.
– Det er noko kommunen må diskutere med Aurland hamnesveisen, Visit Sognefjord og reiselivsnæringa i Lærdal, seier Brandshaug.
– Cruise er omstridd mellom anna grunna forureing og at det kjem mykje folk. Er det rett for Lærdal?
– Det må ein sjå nærare på og diskutere. Men det finst ulike typar cruiseskip og ulike typar cruisegjester. Ein må ha fokus på dei miljøvennlege skipa og dei gjestene som legg igjen mest pengar lokalt, seier Brandshaug.
Reiselivsdirektøren meiner ein også må vurdere om kommunen har nok av tilboda gjestene vil nytte seg av.
– Har ein det i Lærdal? Har ein nok mottakskapasitet og aktivitetar og opplevingar som vil skape arbeidsplassar og lokal verdiskaping? Det er viktige spørsmål ein må sjå ¨på før ein går vidare.