Over 8 millionar meir til helsesøstrene – Men behovet er større, seier dei

– Då kjem vi akkurat opp på det som er minimumsnorma til helsedirektoratet. Det seier Lillian Vassbotten, fagleiar i Førde kommune.

Ei helsesøster i 90 prosent stilling fordelt på 1000 elevar i dei vidaregåande skulane har vore realiteten i Førde.

• LES OGSÅ: Lovar 1000 nye helsesøstrer

No har kommunen fått 300 000 i øyremerkte midlar som skal styrke helsesøstertilbodet, og utgjer ei 40 % stilling i eit år. Med auka bemanning på skulane håpar fagleiar Lillian Vassbotten at dei skal kunne hjelpe fleire elevar.

– Vi har alle gradar av helseproblem i vidaregåande skule, og det er klart at når vi er meir tilgjengelege i skulen, så vil vi lettare kunne gje tilbod til elevane, seier Vassbotten.

Stor mangel på helsesøstrer

Mangelen på helsesøstrer er stor. På landsplan manglar det om lag 850. På grunn av dette løyvde den førre regjeringa 180 millionar kroner ekstra til skulehelsetenesta og helsestasjonar.

Men berre ein av to kommunar brukte pengane på dette. Resten valde å prioritere andre saker, fortel bladet "Sykepleien". Dermed har behovet for helsesøstrer også auka.

• LES OGSÅ: Vil at helsestasjonane tek ansvar
• LES OGSÅ: Helsesøstera får ansvar for 1000 elevar: – Eg må seie nei til mange allereie no, seier ho

Når pengane ikkje er øyremerkte vert det ein kamp om kronene seier kommunalsjef Kurt Even Andersen i Førde kommune.

– Det er ei utfordring å klare å prioritere så store summar innafor eitt felt, når vi veit at det er mange andre felt som har tilsvarande utfordringar, seier Andersen.

Betyr mykje for elevane

Astrid Ingeborg Helgesen Haugen og Jakob Bredesen i Ungdomsråda i Nordfjord meiner det er svært viktig at elevar og studentar har helsesøstrer å snakke med.

– Helsesøstrer betyr mykje. Det er ein person du kan gå til i skuletida dersom ein han helsesøster der. Det er mange som ikkje torer å spørje folk om problem dei har på skulen, då kan det vere godt å ha ei helsesøster som har teieplikt, seier Helgesen Haugen.

– Du kan ta opp tema som du kanskje ikkje føler deg komfortabel å snakke med andre om. Det gjer at du kan få vite ting, bli trygg på deg sjølv, og få svar på spørsmål som du kanskje ikkje ville fått svar på elles, seier Bredesen.

(Artikkelen held fram under biletet)

8 millionar meir til fylket

Den noverande regjeringa har i budsjettet sitt føreslege å gje 200 millionar ekstra frie midlar til kommunane. Av desse pengane får Sogn og Fjordane i overkant av åtte millionar kroner. Førde får 1,1 millionar kroner.

Det er enno uvisst om desse pengane går til helsestasjon og fleire helsesøsterstillingar.

– Eg veit ikkje om vi klarar det, men vi har nokre tankar om å gjere endringar internt i kommunen, slik at vi styrkar tilsvarande sum totalt sett, seier Andersen.

• LES OGSÅ: Ungdom blir deprimerte av overdriven mobilbruk – dei vil at foreldre set grenser

Helsesøster Solveig Heggheim fortel om viktigskapen ved å ha helsesøster:

– Eg meiner at alle midlane som vert løyvd bør vere øyremerka helsesøstrene. Det står at det går til helsestasjon og skulehelsetenesta, men dei er ikkje øyremerka, og då er det eit val kommunen sjølv kan ta. Då vert det ein kamp om midlane, forklarar Solveig Heggheim, helsesøster og leiar i helsesøstergruppa i Sogn og Fjordane.