– Dette viser den enorme frekvensen dei siste 30 dagane i sundet her.
Sjefsskadeansvarleg Åge Solberg peiker mot kartet som er zooma inn på Bab el-Mandeb, den sørlege inngangsporten til Raudehavet som går langs Jemens sørvestkyst.
Kartet viser fleire symbol, mellom anna gule spørsmålsteikn og lilla våpen, tett i tett langsmed sundet.
– Dette representerer angrep, moglege angrep, eller angrepsforsøk, forklarar Solberg.
Frå situasjonsrommet i Solheimsviken i Bergen har Norwegian Hull Club oversikt over dei 10.000 fartøya dei forsikrar på verdsbasis. Herifrå følgjer dei med på moglege truslar, som til dømes vêr.
Men òg angrep.
Det har blitt ein meir aktuell trussel sidan Houthi-militsen byrja å gå til åtak på sivile skip på veg til eller med tilknyting til Israel 3. desember.
Sjøforsikringsselskapet merkar godt at det er fleire hendingar i området, og er i auka beredskap på grunn av situasjonen.
– No skjer det frykteleg mykje i eit avgrensa område. Det er mange skip som seglar gjennom Raudehavet på veg til Middelhavet.
Raud modus
I ein normal situasjon følgjer dei tilsette i Norwegian Hull Club med på situasjonen for kundane deira ute på havet.
Ved ei hending går situasjonsrommet i raudt.
Seinast denne veka hadde Norwegian Hull Club ein situasjon der dei gjekk i såkalla raud modus.
– Då fokuserer me på kva kan me gjere. Kva treng skipet for å avgrense tap av menneskeliv, miljøskade og verdiar?
– Kor dramatisk er det?
– Det er veldig dramatisk. Men det er rolla vår som assurandør å hjelpe. Me har historisk, diverre, erfaring frå tidlegare hendingar. Den brukar me i dei situasjonane.
Rår medlemmer til å segle rundt
Natt til fredag gjennomførte USA og Storbritannia angrep mot Houthi-militsen i Jemen, med sikte på å stanse angrep mot sivil skipstrafikk i området.
Informasjonsminister i Houthi-rørsla, Nasr al-Din Amer, har i etterkant åtvara Noreg mot å blande seg i konflikten, og uttalt at det vil vere aktuelt å angripe norske skip viss Noreg involverer seg.
Administrerande direktør i Rederiforbundet, Harald Solberg, seier det er ein uakseptabel trussel.
– Sivil skipsfart har inga rolle i dei konfliktane som går føre seg i regionen. Det er eit alvorleg angrep mot uskuldig gjennomfart når militsgrupper byrjar å angripe skip.
Han fortel at Rederiforbundet rår sine medlemmer til å segle rundt Afrika viss dei kan.
– For dei som ikkje kan segle rundt, så meiner me at alle sikkerheitstiltak må setjast i verk for å segle gjennom på ein så trygg måte som mogleg.
Direktør i Norsk Sjøoffisersforbund, Hans Sande, er kritisk til at det framleis er norske reiarlag som nyttar passasjen gjennom Raudehavet og Suezkanalen.
– Det er ikkje tiltak på plass i området som gjer at sikkerheita kan garanterast for mannskapet om bord på eit akseptabelt nivå. Me greier ikkje beskytte fartøya mot til dømes droneangrep, og då har dei ikkje noko i det området å gjere.
– Kvifor trur du dei reiarlaga gjer det likevel?
– Eg vil ikkje spekulere i årsaker til at dei ikkje segler rundt. Men eg vil minne dei på at dei har eit moralsk ansvar til å vareteke mannskapa sine. Då må dei sette sikkerheita til mannskapet føre profitt.