– Dette var heilt magisk. Vi har vore her saman i skumringa og opplevd det folkehavet og fått den kampen!
Det seier Merita Mol når NRK treffer ho i Strandvik i Fusa.
Då har sonen Anders Mol og Christian Sørum tatt Noregs aller første OL-medalje i sandvolleyball då dei spelte den russiske duoen av banen i Tokyo i natt.
I Mols heimbygd Strandvik i Vestland har jubelropa truleg aldri vore høgare.
For med knappe 500 innbyggarar var det venta at imponerande 600-700 tilskodarar ville sjå kampen i «OL-anlegget» i Strandvikparken ved fjorden.
NRK var på plass og følgde OL-festen i vestlandsbygda gjennom natta.
«OL-anlegg» i bygda
For medan OL-kampane i Shiokaze Park i den japanske millionbyen har gått for nesten folketomme tribunar, har innbyggarane i Mols heimbygd verkeleg møtt opp.
Midt i sentrum, i ein splitter ny park ved fjorden, har eldsjeler bygd scene og sett opp storskjerm. Her har fleire hundre fått med seg Mol og Sørums veg til OL-finalen.
250 såg kvartfinalen natt til onsdag, og over 350 fekk med seg semifinalen torsdag. Festen har gått føre seg bokstaveleg talt dag og natt.
– Dette er gutedraumen som går i oppfylling for Anders. Dette har han jobba for i fleire år. At dei står i første OL og tek gull er rørande og eg er så stolt, seier Merita Mol til NRK.
Kom folk langvegs frå
Den vesle bygda ved Bjørnafjorden i Vestland har knappe 500 innbyggarar.
I natt sette mange hundre jublande tilskodarar bygda heilt på hovudet.
– Eg veit at det kjem folk frå Naustdal, Oslo, Bergen og elles rundt om i kommunen her. Eg forventar at det vil koma rundt 600-700 i natt dersom alle som har varsla at dei kjem faktisk møter opp, sa Tone Elisabeth Stenevik, familievenn av Mol-familien og styremedlem i det lokale idrettslaget, kvelden før festen braka laus.
Også foreldra til Christian Sørum hadde lagt turen til Strandvik for å delta i festen.
– Eg synest det er veldig kjekt at foreldra til Christian er komne til Strandvik, og vil oppleva dette med oss i bygda.
Regner tre meter i året
Sjølv om sola har skine over Strandvik dei siste dagane, er også denne vestlandsbygda prega av fuktig klima. Tre meter nedbør i året er fasiten.
Det er med andre ord lite som minner om sol, strand og varme. Då hjelper det på at mamma Merita Berntsen Mol har spelt sandvolleyball i OL, og pappa Kåre Mol har nærare 100 kampar i innandørs volleyball.
Og interessa stoppar ikkje hos familien Mol.
Den vesle bygda har éi kyrkje, éin skule. éin nærbutikk – og heile seks sandvolleyballbanar.
Og no: Ein fersk OL-gullvinnar.
Gull til slutt
Natt til laurdag resulterte det i eit historisk OL-gull – som ei heil bygd feira i eufori.
Trass i nokre svake resultat og ein formdupp før sommarleikane, viste paret sin styrke då dei nedsabla den russiske motstandaren.
Medaljen er den første for Noreg i den olympiske greina sandvolleyball. Jan Kvalheim og Bjørn Maaseide fekk ein 7.-plass i 1996, og to gongar har norske lag kvalifisert seg til åttedelsfinalen.