Ferielandet Noreg skal bli meir tilgjengeleg

I eit skogholt med utsikt over fjorden viser eigar av Engeset Trehytter, Olav Aabrekk, stolt fram sitt siste verk.

– Tanken var å skape eit likeverdig overnattingstilbod for alle, som også er litt utanom det vanlege, fortel han.

Trehytta er universelt utforma og tilrettelagt for rullestolbrukarar.

Men slik er det slett ikkje overalt.

Ei spørjeundersøking frå Nordlandsforsking viser at 40 prosent av nordmenn med nedsett funksjonsevne har opplevd ekskludering på ferie i Noreg.

Magnhild Sørbotten er avhengig av rullestol store delar av tida, og er mellom dei som har opplevd slik eksludering.

– Det er sårt at eg og familien min ikkje får den same moglegheita til å oppleve Noreg, slik som andre familiar, seier Sørbotten.

Lite tilrettelegging

I rapporten frå Nordlandsforsking er manglande informasjon og sikkerheitetiltak, dårleg transportmoglegheiter og lite tilrettelegging av ute- og inneareal, nokre av punkta som blir trekt fram som årsaker til eksluderinga.

– Om eg kjem meg fram til overnattingsstaden, treng eg ofte hjelp til å kome meg inn i bygningane. Grunna dårleg tilrettelegging kan det også vere vanskeleg å finne aktivitetar å delta på, seier Sørbotten..

Ho meiner at enkle grep kan gjere tilbodet tilgjengeleg for fleire.

Norsk reiseliv er ikkje tilpassa for alle

– Vi har mykje naturbasert reiseliv i Noreg og vi har ikkje hatt tradisjon for tilrettelegging, seier Aase Marthe J. Horrigmo, som er direktør for reiseliv i Innovasjon Noreg.

Ho understrekar at dei ser ei positiv utvikling hjå aktørar som vil legge til rette for fleire, men det er framleis for stor variasjon i tilbod tilgjengeleg for alle.

–Reiselivsaktørane trenger å bli bevisstgjort på problematikken, men også få kunnskap om korleis dei kan tilpassa for å kome dei besøkande i møte.

Med ein son som sit i rullestol har Olav Aabrekk i Gloppen sjølv opplevd utfordringar med å finne spennande overnattingsplassar tilpassa familien sitt behov. Det er noko han ønskjer å gje til andre.

Bilen kan køyrast heilt inntil, og trappa er bytta ut med ei rampe. Inngangsdøra har ei brei opning, dørstokken er fjerna og innvendig er det god golvplass.

– Eg håpar at dette kan gje fleire moglegheita til ei spektakulær natt tett på naturen, men også at hytta kan inspirere fleire i reiselivsbransjen til å skape tilgjengelege reiselivsprodukt.

Ønskjer å gjere reiselivet tilgjengeleg for fleire

I 2021 starta Nordlandsforsking opp prosjektet Acesstour. Målet er å gjere reiselivet i distriktet tilgjengeleg for fleire.

– Det er så mange som har ein eller annan form for funksjonsnedsetting. Difor er det så viktig at dei opplever å få eit likeverdig tilbod, seier Karin Marie Antonsen.

Forskingsgruppa arbeider med å formidle kunnskap til reiselivsaktørar for at dei kan tilpasse tilboda sine betre.

Gjennom kartleggingsverktøy skal aktørane bli bevisstgjort på «kor skoen trykker».

– Vi opplever at lokale reiselivsbedrifter er positive og velvillige. Så eg er optimistisk til reiselivet framover, seier Antonsen.