Så mange manglar vegadresse

Sogn og Fjordane er det fylket med dårlegast dekningsgrad, og dårlegast framdrift på arbeidet med å gje vegadresse til alle husstandar.

På landsbasis har 540.000 personar framleis ikkje fått vegadresse.

• SJÅ: Slik står det til med vegadressene i Norge (. xls-fil)
  

– Det er kommunane som fastset offisielle adresser til eigedomar i Norge, og Kartverket som hjelper til kommunane i dette arbeidet. Vi er ikkje nøgde med tala, seier kartverksjef Anne Cathrine Frøstrup.

Alle skal ha innan 2015

Kartverket starta tidleg på 2000-talet opp arbeidet med å få vegadresser på alle eigedomar i landet. I løpet av det siste året har knapt 50.000 husstandar fått vegadresse.

I Sogn og Fjordane har ikkje Solund, Hyllestad, Askvoll, Fjaler og Selje vegadresser. Kartverket har som mål at det skal alle ha innan 2015.

(Artikkelen held fram under tabellen)

Dersom ikkje naudetatane har ei konkret vegadresse å rykkje ut til, kan i verste fall liv gå tapt. Slikt uroar.

– Dette viser eit veldig sårbart system, og vi synst det er svært alvorleg, fortalde Frode Jahren som er generalsekretær i Landsforeininga for hjerte- og lungesjuke, i haust.

36.000 utan vegadresse

I Sogn og Fjordane har nær 60 prosent av alle eigedomane som ikkje har vegadresse, 36.000 i talet, berre gards- og bruksnummer som adresse.

– Dersom innringar ikkje veit kvar han er, kan det ta verdifull tid til å «snakke seg fram» til dette. Det oppstår ofte problem og misforståingar når adressa er mangelfull, ikkje minst i område der ein framleis opererer med gards- og bruksnummer, skriv Kartverket i ei pressemelding.

– Avgjerande for GPS

Då NRK var med ambulansearbeidarane Bjørn Egil Sunde og Stian Helgheim i fjor haust, kunne dei fortelje at dei også må stole på ting som fargar på hus eller andre landlege kjennemerke når dei leitar seg fram til adresselause hus .

(Artikkelen held fram under TV-saka)

Dette er ein tidkrevjande måte å finne fram på. Riktig vegadresse er avgjerande for at ein skal finne fram ved hjelp av GPS.

– Det kan vere pumpestasjonar, postkassestativ, farge på husa og liknande. Men det betyr at vi må setje tempoet ned veldig mykje skal vi klare å sjå etter alle desse landemerka, sa Sunde.

Best i Aust

Kartverket opplyser at Østfold, Akershus, Oslo og Vestfold er fylka med den høgaste dekninga. Her har over 90 prosent eller meir av eigedomane fått vegadresse.

Sogn og Fjordane, Møre og Romsdal og Nord-Trøndelag er framleis fylka som kjem dårlegast ut når det kjem til vegadresse.