Desse vindkraftparkane produserer mest

Trass i at det var mindre vind enn normalt i fjor, auka den norske vindkraftproduksjonen med 20 prosent sett opp imot 2020.

Av dei 64 norske vindkraftverka var det Storheia vindpark på Fosen i Trøndelag som produserte mest i 2021 med 889 GWh.

Det er nettopp i Midt-Noreg og Sør-Noreg det er flest utbyggingar og størst produksjon, fortel seksjonssjef Ann Myhrer Østenby i Noregs vassdrags- og energidirektorat (NVE).

Områda svarar til prisområda for straum kalla NO3 og NO2.

– I fjor var det størst produksjon i Midt-Noreg, det stemmer med normalen, seier Østenby.

Desse vindkraftverka produserte mest i 2021:

• Storheia (NO3): 889 GWh
• Roan (NO3): 776,7 GWh
• Guleslettene (NO2): 651,2 GWh
• Tonstad (NO2): 598,6 GWh
• Geitfjellet (NO3): 510,5 GWh
• Kvitfjell (NO4): 494,9 GWh
• Tellenes (N02): 490,4 GWh
• Bjerkreim (NO2): 476,7 GWh
• Skinansfjellet og Gravdal (NO2): 437,5 GWh
• Midtfjellet (NO2): 361,2 GWh

Utgjer ein tidel

Den totale kraftproduksjonen i Noreg auka med 3,1 TWh i 2021, noko som var ein mindre auke enn året i førevegen. Samtidig auka forbruket.

Vindkrafta utgjer i eit normalår kring ein tidel av den totale kraftproduksjonen i Noreg.

Totalproduksjonen av vindkraft var på 11,8 terawatt-timar i fjor. Det er ein auke på 1,9 terawatt-timar frå året før.

Årsaka til auken i 2021 er at fleire konsesjonar gjekk ut ved utgangen av fjoråret og at det då vart fleire utbyggingar, fortel Østenby.

Frå 2017 har produksjonen av vindkraft teke seg opp betrakteleg.

Det har vore forventa i mange år at det kom til å bli ein auke i vindkraftutbyggingar, seier seksjonssjefen i NVE.

– Det har vore store utbyggingar fordi det har vore mange konsesjonar som gjekk ut ved utgangen av 2021 og det har vorte meir lønnsamt å bygge ut vindkraft dei seinare åra.

Ventar færre utbyggingar

Eit aukande kraftbehov i Europa har gjort at fleire er interesserte i vindkraft.

– Investeringslysta har auka kraftig berre no i mars månad. Og det dukkar stadig opp nye prosjekt både her på berget og lenger sør i Europa, har kraftanalytikar John Brottemsmo i Kinect Energy tidlegare sagt til NRK.

Noreg er delt inn i fem prisområde for straum. Av desse er det berre området NO5 på Vestlandet som ikkje har vindturbinar.

Konsesjonssaker for vindkraft har vore sett på pause. No er det ikkje mange gyldige konsesjonar. Nokre har fått utsetjingar grunna pandemien og nokre blir sett i drift i år, fortel Østenby.

– Vi ser føre oss at det blir vesentleg mindre utbygging av vindkraft etter at desse konsesjonane er bygde ut.

Nye signal

Regjeringa har kome med enkelte signal om at vindkraftutbygginga på land vil kunne starte opp att.

Bakgrunnen er den norske kraftforsyninga og Ukraina-krigen som har gjort at Europa har sett opp tempoet med å frigjere seg frå «det russiske gassgrepet».

Statsminister Jonas Gahr Støre (Ap) har uttala at han vil ha «ein del fleire» vindmøller til lands, med vedgjekk samtidig at dette er omstridd.

– Eg vel å tru at eit langstrekt land som Noreg har nok natur til at vi kan gjere dette på ein skånsam måte, har Støre sagt til NRK.