Det fresar i lapperøyra Monica legg på takka i Aurland sentrum. Rundt ho gjer fleire seg klare til å delta i «baklukeloppis».
Men stemninga på vangen er ikkje slik den brukar å vere når folk samlast.
- Les også:
– Råkar oss alle
For ute på fjorden er mange andre i aksjon for å leite etter han som sa ja til at dei kunne ha loppemarknaden, Christoffer Lysne Elgåen (29).
Kommuneplanleggaren og brannmannen har vore sporlaust vekke sidan natt til førre laurdag. Alt tyder på at han ramla på fjorden.
– Dette er ei sak som råkar oss alle, seier Monica.
Då ho la ut på Facebook at ho ville steike lappar til inntekt for Røde Kors, gjekk det raskt.
– Folk byrja å vippse meg og vi har alt fått inn nær 80.000 kroner.
Pengane går uavkorta til leitinga etter Christoffer.
Laurdag blir det leita langs land og frå båtar eit stort område i Sogn.
– Søkeområdet er utvida til heile Sognefjorden. Folk som har fritidsbåtar og arbeidsbåtar må sjå om dei ser noko. Vi er veldig avhengige av å få hjelp frå alle for å finne, seier områdeleiar i Røde Kors, Ove Forthun.
Djupt imponert over folk
Lenger nordvest i Sogn og Fjordane er svært mange engasjert i ein annan leiteaksjon denne helga.
Torsdag gjekk alarmen i Askvoll då ein krabbefiskaren Jarle Håvard Nikøy (36) ikkje kom heim til familien. Sidan har det vore leita dag og natt.
Ein av dei som er ute på sjøen i dag er Stian Madsen.
– Det føles godt å hjelpe. Det er ein jobb ein gjer fordi du bryr deg om det samfunnet du bur i og bryr deg om personar som du kjenner.
Aksjonsleiar for Røde Kors i Askvoll er Espen Rysjedal. Han er djupt imponert over den innsatsen dei frivillige legg ned.
– Oppmøtet er enormt. Vi har alltid eit håp om å finne den vi leitar etter i live. Men dessverre er det ikkje slik at ting går rett veg.
– Alle stiller opp
Både i Aurland og Askvoll er det svært sterke straumar i fjorden som kan føre eit menneske langt av garde.
Det gjer leitearbeidet ekstra vanskeleg. Det og kjensla du får når du leitar etter nokon du kjenner.
– Folk er prega, det er ei bygd der alle kjenner alle. Samtidig er det ein styrke. Alle stiller opp, seier Askvoll-lensmann Åge Løseth.
Inne i Sognefjorden er Monica Finden godt i gang med å selje lappar til alle som kjem forbi.
Samtidig plingar vipps-lyden på telefonen heile tida. Folk vil bidra med det dei kan.
– Bygdefolket ønskjer så sterkt at han skal bli funnen, avsluttar ho.