Brunost-feber i Sør-Korea – no vil Noreg utvide satsinga i Asia

Brunosten har blitt stor i Asia.

No vil fleire land lære seg kunsten å lage den norske osten.

Det er særleg blant unge i den sørkoreanske hovudstaden Seoul at brunosten har blitt trendy.

I fjor selde TINE over 100 tonn med brunost til «den fjerne Austen», og i år er salet av brunost dobla i Sør-Korea.

Den aukande populariteten gjer at sørkoreanarane denne veka reiste til Vestlandet for å lære meir om brunosten.

– Eg er her for å sjå på brunostfabrikken og sjå på moglegheitene for å utvide brunost-satsinga i Sør-Korea, seier Heesook Shin, som er global merkevaresjef i Seoul Diary.

Størst etter Sverige

– I fjor var Sør-Korea den nest største eksportmarknaden for brunost. Sverige er framleis størst, men det gjev ein peikepinn på kor populært brunosten er blitt i det marknaden, seier Sigmund Bjørgo.

Bjørgo er ansvarleg for Ny internasjonal vekst i TINE, og vil no utvide satsinga til fem andre land i Asia.

– Lengre fram i tid skal vi ha eit fotfeste i ein rekke marknader i Asia, men også andre stader, seier Bjørgo.

Brukar brunosten i peanøttsmøret

Sjølv om brunosten har blitt populær i Sør-Korea, så har ikkje salet av ostehøvlar tatt av.

Der raspar dei brunosten som topping på mellom anna dessertar.

– Vi brukar han også på pizza, og «koreanske Burger King» bruker han i peanøttsmøret sitt, seier Heesook Shin.

Fabrikksjefen på Byrkjelo, Thorkild Heieren, trur slike kreative løysingar kan bli ein suksess også blant nordmenn.

– Vi har mykje å lære av dei om korleis vi kan bruke brunosten på andre måtar som kan fenge yngre nordmenn meir enn den tradisjonelle bruken, seier han.