Finanstilsynet har tidlegare vore kritiske til at selskapet skal granskast av Deloitte, som også er revisor for Ferde.
No er Knut Inge Andersen i Folkeaksjonen Nei til Bompengar kritisk til at kontrollutvala i Hordaland og Sogn og Fjordane ikkje valde eit anna selskap.
Andersen er redd dobbeltrolla vil gjera det nødvendig med ein ny rapport.
– I verste fall må ein byrja på nytt, dersom det dei finn i rapporten på noko vis kan verta farga av omsynet til eigen posisjon.
Tek saka til fylkesordføraren
I fylkesutvalet i Hordaland, på torsdag neste veke, kjem Andersen til å spørja fylkesordføraren om det er grunnlag for å be om ei ny vurdering av oppdraget.
FNB tok først opp spørsmålet i fylkesutvalet til Vestland denne veka, der dei er representert. Saka blei deretter sendt vidare til fylkesutvalet i Hordaland på anmodning frå fylkesordføraren.
– Me meiner det er viktig å få på plass ein rapport som kan stå hundre prosent på eigne bein, og som kan brukast utan atterhald.
Bakgrunnen for granskinga er at sjefen i Ferde har handla med selskapet BTS Norway, der han sjølv hadde eigarinteresser, og kjøpt tenester frå ein tilsett sitt firma. Den tilsette overdrog seinare kontrakten til kona si.
Deloitte var i 2018 revisor for både Ferde og BTS Norway.
Ville koma raskt i gong
Kontrollutvala i Hordaland og Sogn og Fjordane tinga 3. september ein såkalla selskapskontroll av bomselskapet Ferde frå Deloitte.
Leiar i kontrollutvalet i Hordaland Fylkeskommune, Inge Reidar Kallevåg, seier til NRK at dei ikkje er redd for dobbelrolla. Han seier at dette heller ikkje er nytt for dei.
– Me bruker Deloitte i mange situasjonar, sjølv om dei er revisor for fylkeskommunen.
Han seier dei valde Deloitte for å få prosessen raskt i gong.
– Skulle me brukt eit anna selskap ville det teke fleire veker å få på plass.
– Om Deloitte si rolla gjer at de må tinga ein ny rapport tek det jo veldig mykje lengre tid. Er det ikkje betre å vera føre var?
– Me kan ikkje mistenka Deloitte for å villa dekka over ting. Me må stola på at dei er proffe.
Kallevåg fortel at fylkeskommunen har sendt ein formell førespurnad til Finanstilsynet, for å få konkrete svar på kva dei meiner er kritikkverdig.
NRK har vore i kontakt med styreleiar i Ferde, Paul Magne Nilsen. Han seier han ikkje ønskjer å kommentera saka.
Eit uavhengig organ
Fylkesordførar i Hordaland, Anne Gine Hestetun (Ap), seier at kontrollutvalet er eit uavhengig organ, med fullmakt til å gjera eigne avgjerder.
– Når dei har bestemt noko, så legg ikkje me oss opp i det.
Styreleiaren i Ferde skal orientera under fylkesutvalet komande torsdag. No ynskjer Hestetun også å invitera Kallevåg og kontrollutvalet til å orientera.
Hestetun legg til at dei som eigarar ventar på den uavhengige, objektive vurderinga som advokatfirmaet Kluge skal utarbeida.