Ei bøn om hjelp for ein son, ein ektefelle eller for seg sjølv.
Innboksen til Bjarne Hansen er full av dei.
Kvar gong eit medium har vore på besøk i hjørnekontoret i Møllendalsbakken i Bergen, kjem brev og e-post frå folk som seg 4-dagarsmetoden som ein mogeleg veg ut av ein fortvilande situasjon.
– Det gjer vondt å lese. Ofte er det vanskeleg å gje desse eit tilbod. Samstundes viser det at arbeidet vi gjer er viktig, seier psykologen, som leier senteret «the Bergen 4-day treatment» i Helse Bergen.
Hovudfokus no er å kunne spreie behandlingsmetoden til stadig nye land.
Ei tildeling frå Kavli-fondet gjer at han i løpet av året skal drive opplæring i Kenya og Ecuador. Frå før er behandlinga tilgjengeleg i USA, Tyskland, Island og Singapore og mange fleire land rundt om på globusen.
Dermed vil Bergensmetoden bli tilbode i alle verdsdelar.
Samarbeider med Harvard
Det har gått over ti år sidan NRK først fortalde om behandlingsmetoden, som gjer folk friske frå psykiske lidingar på kort tid.
Interessa for metoden eksploderte. Forskarane bak vart mellom anna kåra til å vere mellom dei viktigaste personane innan helse i verda.
Bjarne Hansen har brukt mykje av dei siste åra til å reise rundt til ulike land for å lære opp nytt personell frå ulike helsevesen.
– Vi har eit strengt system for kvalitetssikring. Heldigvis ser det ut til at å ha gode og stabile resultat sjølv om landa og kulturane kan vere annleis, seier psykologiprofessoren.
Denne veka har han vore ved Harvard-universitetet i USA, som dei har eit samarbeid med.
– Helsevesen i ulike land er likare enn vi ofte trur. Det hender at vi får utfordra våre fordommar mot ulike land når vi reiser rundt, innrømmer psykologiprofessoren.
Har kasta hanskane
På kontorveggen i Bergen heng ein fotomontasje Hansen sjølv har teke.
Den er frå ein tidleg behandlingsrunde i Houston, Texas, med Solange Villalba, ein kvinneleg pasient som grunna tvangstankar blant anna gjekk med hanskar for å beskytte seg mot smitte.
No er ho fri frå lidinga.
– Det var ein overveldande kjensle av fridom. Eg blir framleis gripen når eg tenkjer på det. Behandlingsprogrammet var heilt fantastisk for meg, seier ho til NRK.
For Hansen betyr og bileta mykje.
Historia til Solange er ein av mange.
For Hansen og dei andre behandlarane gjev dei motivasjon til å halde fram arbeidet.
– Det er jo eit eventyr, på ein måte. Det veldig mange behandlarar som er interesserte i ta å ta dette i bruk.
Og veldig mange menneske som har eit håp om å bli friske gjennom ein metode utvikla i Bergen.