I sommar skal mange nytte det Noreg har å by på.
I ei undersøking gjort for DNB oppgir nesten halvparten av dei som har svart, at dei vil bruke mindre pengar på ferie denne sommaren.
– Me er inne i eit spesielt år på grunn av korona. Det er klart at mange skal bruke mykje mindre på ferien og fleire skal feriere i Noreg, seier forbrukarøkonom i DNB, Silje Sandmæl.
I undersøkinga oppgir nordmenn at dei i snitt per husstand skal bruke 13.411 kroner på ferie. Tilsvarande tal frå i fjor låg på 19.841 kroner.
Sandmæl seier at beløpet aldri har vore så lågt. Men det treng ikkje gå utover kvaliteten på ferien.
Forbrukarøkonomen har eit råd til barnefamiliar i landet.
– Ikkje sei at ferien er kansellert eller at de ikkje har råd. Hald på det at ferien kan vere eit eventyr, sjølv om han blir i nærområdet eller rundt i Noreg.
Kanselleringar
I den same undersøkinga seier også nærmare tre av fem at den planlagde sommarferien har blitt kansellert eller avbestilt.
– I tillegg har mange blitt permittert, så 25 prosent oppgir at ein vanskelegare økonomisk situasjon er årsak til at dei har endra ferieplanane i år, seier Sandmæl.
Framleis tøft
Sjølv om mange nordmenn skal feriere i Noreg denne sommaren, er det tøft for reiselivsnæringa, seier leiar for Virke Reiseliv, Astrid Bergmål.
– Me er nok redde for at det ikkje veg opp for dei utanlandske turistane som ikkje kjem.
Virke Reiseliv ser tendensar til at mange har tenkt til å feriere i eigen region og lokalmiljø, komme seg ut på tur og bruke eigen hytte denne sommaren.
– Dette er ein sommar der ein verkeleg har høve til å oppleve nye ting. Mange hadde eigentleg tenkt å dra til utlandet, men skal no feriere i Noreg.
– Eit av verdas vakraste land
Sandmæl er ikkje i tvil om at ein har mange høve til å få ein god ferieoppleving i Noreg.
– Det er utruleg mykje ein kan gjere som ikkje kostar så mykje pengar. Me bur faktisk i eit av verdas vakraste land.
I undersøkinga kjem det fram at mange skal ferdast langs vegane i sommar.
– Eit sparetips på biltur er å ha ein kjølebag i bilen med drikke og mat.