Brannen hos Kari gjekk landet rundt: – Det blei mykje oppstyr

11. mars 2023 blei ein dramatisk dag hos Tisjø i Drangedal.

Ho hadde bestemt seg for å bruke den fine laurdagen til å brenne ned eit lite uthus, som var klart til å bli rive.

Det klarte ho, men brannen spreidde seg også til hovudhuset. Tisjø måtte kontakte naudetatane.

– Det blei mykje oppstyr, samanfattar ho eitt år seinare.

Plutseleg var både politi, brannvesen og ambulansepersonell på plass. Fylkesvegen forbi eigedommen blei stengd i fleire timar.

– Dette blir ikkje billig, tenkte eg.

Skulle fjernast

Hovudhuset skulle også rivast, men planen var at det var maskiner, og ikkje flammar, som skulle sørge for det.

Nå har det gått eit heilt år sidan den spesielle laurdagen.

– Eg har ikkje fått opp nokon minne på telefonen, men det er kanskje like greitt.

Store delar av gangen i hendinga blei nemleg dokumentert på Snapchat.

– «Dette er gjort på 20 minutt», seier eg på filmen. Det stemte for så vidt, men sidan det spreidde seg tok det litt lengre tid.

Blei bekymra

Historia om kva som hadde skjedd dukka først opp hos Telemarksavisa. Etter kvart blei Tisjø kontakta av ei rekke andre medium.

Plutseleg kunne folk i heile landet lese om den spesielle tabben.

– Det er gøy å få folk til å smile og le, men det var ikkje meininga å brenne ned hovudhuset. Eg var litt bekymra da dette blei slått opp som ei gladsak.

Politiet etterforska brannen, men etter nokre månader blei saka lagd bort på grunn av bevisstillinga.

I samband med at saka vart lagt bort sa politiinspektør Hans Egil Seljordslia til Varden at det ikkje blei funne bevis på at huseigaren hadde opptredd aktlaust.

– Eg er veldig glad for at det ikkje fekk så store konsekvensar, men eg var førebudd på alt, seier Tisjø.

Eitt år etter brannen ser det heilt annleis ut på eigedommen. Eit nytt bryggarhus og ein ny garasje er på veg opp, og etter kvart kjem det også eit heilt nytt hovudhus.

– Nå ser det veldig bra ut.

• Ungdommar har større forventningar til arbeidsplassen enn før, ifølge bemanningsbyrå. Mange vil ha deltidsjobbar som gir mykje fridom.