Årets påske kjem tidleg, men store snømengder fleire stader i landet gjer at du likevel kan bli både solbrent og snøblind viss du er ute i sola.
– Gammal snø kan auke solstrålinga med 50 prosent, mens nysnø faktisk kan auke strålinga med over 80 prosent, seier Lill Tove Nilsen.
Ho er fagdirektør i Direktoratet for strålevern og atomtryggleik (DSA).
– Det kjem av at snøen spreier og reflekterer solstrålane veldig effektivt.
Bruker du solkrem?
Dei oppfordrar også folk til å ta forholdsreglar før dei legg ut på skitur i påskefjellet.
– Vi anbefaler å følge med på UV-varselet, og at ein vernar seg med solkrem og med solbriller som dekker godt for stråling som kjem inn frå sidene, seier ho i ei pressemelding.
Følger nøye med
Utanfor Skien vidaregåande skole treffer NRK Nora Ellegård Berge (17) og Josefine Bergum (16).
Jentene tar matpausen i sola, men forsikrar oss om at dei tar stråling på alvor.
– Først og fremst på grunn av faren for kreft, seier Bergum.
For sjølv om det er freistande å sleppe til sola litt ekstra for å få farge, vel ho å smørje seg godt.
– Eg blir eigentleg berre raud om eg droppar solkrem, ler ho.
Berge er også tidleg ute med tuben når sola dukkar opp.
Ho har også ein eigen app på telefonen der ho kan følge med på UV-indeksen.
– Eg ser mest på han for moro skuld. Eg prøver å smørje meg uansett, men det freistar nok av og til å droppe solkrem, innrømmer ho.
UV-indeksen kan sjekkast på NILUs UV-teneste her.
Der finn du UV-kart for heile verda, og du kan søke på kjente stadnamn og byar. Eit eige UVI – Noregskart finst her.
Desse karta er baserte på UVI-berekningar der daglege snødata frå NVE er inkluderte.
UV-indeksen kan også sjekkast i Yr-appen og på yr.no, under fanen «Andre varslar».
– Kva er den viktigaste årsaka til at du vernar deg?
– Eg vil ikkje ha rynker eller hudkreft, seier Berge.
Kan vere svært skadeleg
I Sør-Noreg, særleg i fjellområde med nysnø, kan UV-indeksen komme opp mot 4 i påska.
Reiser du til meir solrike land i påska, er UV-strålinga langt sterkare.
I Spania og Hellas kan indeksen komme opp mot 6 og 7 i mars-april. Det betyr sterk UV og høg risiko for å bli solbrent.
– Sjokksoling i Syden etter ein lang vinter i Noreg er veldig skadeleg, åtvarar Ingrid Stenstadvold Ross. Ho er generalsekretær i Kreftforeningen.
– Huda gløymer ikkje, og jo fleire gonger ein blir solbrent, jo større blir risikoen for å utvikle hudkreft, seier ho.