Det er snakk om dronane Switchblade 300 og den større Switchblade 600. Begge er produserte av AeroVironment.
300-modellen kan treffe mål på ein knapp mils avstand, medan den større har rekkjevidd på godt over tre mil.
Politico skriv at dronane kan fly i opptil 30 minutt mens dei blir styrte mot målet av ein operatør på bakken.
Veg 2,5 kilo
Dronane er utstyrte med kamera og rakettar. Dei minste veg berre 2,5 kilo og kan fraktast i ein liten ryggsekk. Militære ekspertar meiner dei vil gi Ukraina ein heilt ny moglegheit i kampen mot Russland.
Begge dronane er raske å bruke og enkle å styre. Måla kan vere stridsvogner, artilleri eller bilar.
Onsdag kunngjorde president Joe Biden at USA skal sende militærhjelp til Ukraina for over ein milliard dollar. Det svarar til vel 9 milliardar norske kroner.
Våpeneksporten markerer eit skifte i amerikansk våpensal. Primært har dei sendt defensive våpen, som panservernvåpen og antiluftskyts.
Brukt i Afghanistan
Dronevåpenet vart først tatt i bruk av amerikanske spesialstyrkar i Afghanistan. Storbritannia har og teke slike dronar i bruk.
I tillegg til Politico har òg NBC News, CNN og nyheitsbyrået AP fått vite at USA skal sende dronane til Ukraina.
LES OG: Vi risikerer å bli skotne av våre eigne folk
Nytt hastemøte i FN
Torsdag skal Tryggingsrådet i FN ha eit nytt hastemøte om den humanitære krisa i Ukraina.
Det er Noreg, Storbritannia, USA, Albania, Frankrike og Irland som har bede om hastemøtet.
– Over 3 millionar menneske har flykta frå Ukraina. Dei menneskelege lidingane blir verre for kvar dag som går. Vi har bede om møtet for å sikre at alle medlem i Tryggingsrådet er oppdaterte om situasjonen for dei sivile og følgjane av denne forferdelege krigen. Det seier Noregs FN-ambassadør Mona Juul til NTB.
– Noreg vil halde fram med å legge hardt press på Russland for å stanse krigshandlingane, seier ho.
Verdas helseorganisasjon, FNs høgkommissær for flyktningar og FNs politiske kontor (UNDDPA) skal halde innlegg i møtet.
– Russland gjer krigsbrotsverk og retter åtak mot sivile, tvitra Storbritannias FN-delegasjon onsdag.
– Russlands ulovlege krig i Ukraina er ein trussel mot oss alle, skriv britane.
