Dette har vore eit stridsspørsmål i mange år i USA, og når Panetta opphevar dette forbodet opnar det for at kvinner kan utplasserast i avdelingar som kjem i kamp på bakken, melder fleire amerikanske fjernsynsstasjonar og nyheitsbyrå i kveld.
Nærkamp på bakken
Leon Panetta vil kunngjere dette torsdag, i det som truleg blir den siste store saka før han i løpet av kort tid går av som forsvarsminister.
– Vi vil ha slutt på ordninga med at kvinner ikkje skal tenestegjere i avdelingar som kan kome i direkte kamp, seier ein tenestemann i Det amerikanske forsvarsdepartementet til CNN.
Lova som regulerer kvinner sine roller i det amerikanske forsvaret vart vedteken i 1994. Då vart kvinner utestengde frå avdelingar der ein måtte rekne med nærkamp på bakken.
Frist til 2016
Kjelda i forsvarsdepartementet seier at Panetta har gitt forsvaret trist til 2016 med å finne eventuelle unntak frå at kvinner skal kunne delta i alle operasjonar. For kvinner som ynskjer å prøve seg i eliteavdelingar som Navy Seals og Hærens Delta-styrke kan det ta endå lenger tid.
Med denne endringa så svarar Panetta på eit ynskje frå Pentagon om å opne rundt 14.400 plassar for kvinner i avdelingar som kan kome i direkte kamp, dei aller fleste i hæren.
Lovendringa kan bety at 230.000 jobbar i Hæren og i Marineinfanteriet kan opnast for kvinner.
1,4 millionar menneske tenestegjer i dag i dei væpna styrkane i USA. Av desse er 14 prosent, rundt 196.000, kvinner.