Stemninga er aggressiv i Dresdens overfylte gater måndag kveld, og NRK var vitne til to slåstkampar på veg til Teaterplassen der Pegida-medlemmer og motdemonstrantar under parolen «Med hjarte i staden for hat» har samla seg.
Politiet står som ein jarnring mellom demonstrantar og motdemonstrantar, og mellom Pegida og journalistane, etter at to journalistar vart slått ned under ein tidlegare demonstrasjon. Pegida-medlemmene er svært kritiske til pressa som dei kallar «løgnpresse».
Volker og Melanie Forker frå Dresden er to av dei som har møtt opp for å demonstrere mot Pegida. Dei synest at det er fryktelig at byen deira vert assosiert med den innvandringsfiendtlige gruppa.
– Dei siste vekene har Pegida blitt sterkare, men vi vil vise at vi er fleire som er imot, seier Forker til NRK.
Stigande misnøye med den tyske flyktningpolitikken
Pegida, som står for Patriotiske europearar mot islamisering av Vesten, vart til for eit år sidan og starta med demonstrasjonar kvar måndag, først i Dresden, seinare i fleire andre tyske byar. Etter kvart spreia rørsla seg til andre europeiske land, også i Noreg.
Oppmøtet på demonstrasjonane i Dresden toppa seg i januar med 25.000 deltakarar. Etter ein periode med lågare aktivitet har rørsla no fått vind i segla i takt med den stigande misnøya ovanfor Merkel sin flyktningpolitikk, spesielt aust i landet. Leiaren for gruppa, Tatjana Festerling, har sagt at Merkel er uansvarleg og at ho er den farlegaste kvinna i Tyskland. Dei meiner at ho har forvandla Tyskland til «ein gigantisk leir i jungelen».
Den politiske leiinga åtvarar mot rørsla
Og demonstrasjonane vert stadig meir aggressive. Førre måndag hadde demonstrantane laga galger med skilt som skulle vise at galgen var reservert til Merkel og visekanslar
Sigmar Gabriel. På laurdag vart borgarmesterkandidat Henriette Reker knivstukke i Köln. Ho har uttrykt støtte til asylsøkarar, og gjerningsmannen hadde ifølge politiet bakgrunn i det høgreekstremistiske miljøet. Etterretningsmiljøet følger no nøye med på dette miljøet.
Innanriksminister Thomas de Maizière åtvara tyskarane mot gruppa som han omtaler som høgreving-ekstremistar i eit intervju med kanalen ARD søndag, og refererte til auken i angrep på asylsøkarar i landet.
– Hat gir grobotn for slike handlingar. Hald dykk unna dei som fyller landet vårt med dette hatet, denne gifta, sa de Maizière.