Ny meiningsmåling: Nær halvparten av republikanarane vil ha Trump

Meiningsmålinga er gjennomført av Ipsos for nyheitsbyrået Reuters og er gjort blant folk som beskriv seg som republikanarar.

Nær halvparten av dei vil ha Trump tilbake til det kvite hus, viser den ferske målinga.

Oppslutninga om den tidlegare presidenten har auka med 4 prosentpoeng frå mars.

Ny, auka støtte

Målinga er gjennomført mellom 31. mars og 3. april, altså etter at det vart kjent at Trump blir tiltalt i den såkalla «hysjpenge»-saka.

Pornoskodespelar Stephanie Clifford, kjent under namnet Stormy Daniels, har sagt i fleire intervju at ho hadde ei affære med Donald Trump i 2006.

Trump, som på den tida var mest kjent for si rolle i reality-serien The Apprentice, var då gift med Melania Trump.

Trump skal, via sin advokat, ha betalt Daniels over ein million norske kroner for å halde tett om hendinga, då han i 2016 stilte som presidentkandidat.

Rivalen taper terreng

Berre 19 prosent av dei spurde seier dei helst vil ha Florida-guvernør Ron DeSantis som ny presidentkandidat.

Det er eit fall på 30 prosent frå mars.

Då fekk DeSantis kritikk for å ha sådd tvil om Ukraina-støtta.

Han sa at å bli ytterlegare innblanda i «ein territoriell disputt» mellom Ukraina og Russland ikkje er ei viktig nasjonal interesse for USA.

DeSantis har enno ikkje formelt kunngjort at han ynskjer å kjempe om å bli partiets president, men det er venta at han vil gjere det.

Dei andre rivalane i den republikanske valkampen har ei oppslutning på under 10 prosent.

Trur det er politisk motivert

Undersøkinga tek og for seg kva folk meiner om den juridiske prosessen mot Trump.

Heile 80 prosent av republikanarane som vart spurde meiner prosessen mot Trump er politisk motivert.

Samstundes meiner 58 prosent at Trump faktisk betalte pornoskodespelar Stormy Daniels for å halde tett om den påståtte affæren mellom dei.

Om ein tek med resten av dei spurde, også dei som ikkje er republikanarar, er tala på 51 og 71 prosent på dei same spørsmåla.