I går annonserte politiet i Toronto i Canada at dei har arrestert to personar for terrorplanlegging, og dermed hindra eit mogleg terroråtak mot jernbanalinja som går mellom New York og Toronto.
- Dette er saka:
Dei arresterte, 30 år gamle Chiheb Esseghaier, og 35 år gamle Raed Jaser, var aktive i det islamske miljøet i Canada, og har ifølgje politiet band til terrororganisasjonen al-Qaida.
Men utan tips frå det islamske miljøet ville aldri politiet hatt sjanse til å arrestere dei to. Dette stadfestar etterforskar Doug Best til Al Jazeera.
Tips frå muslimar førte fram
– Dette tipset, denne leietråden, kom frå det islamske miljøet. Utan denne hjelpen ville me ikkje ha snakka om ein arrestasjon, seier advokat og talsperson i det islamske miljøet i Canada, Hussein Hamdani.
Muslimane i Toronto seier at det er frykt i det muslimske miljøet om at vanlege muslimar skal hamne i problem på grunn av terrorarrestasjonane. Det er difor viktig for dei å presisere at muslimar hjelpte politiet i etterforskinga.
– Dette er prov på at det kanadiske islamske miljøet er forkjemparara for fred, i staden for å bli sett på som medskuldige, seier Hamdani.
Hadde kapasitet
Politiet fortalte på ein pressekonferanse at dei to arresterte hadde både kapasitet og intensjon om å utføre terroråtaket. Dei var ikkje kanadiske statsborgarar, og det er ikkje kjend korleis dei kom seg inn i landet.
– Det ville ha resultert i at uskuldige ville blitt drepne eller skadd, sa politiet på ein pressekonferanse i går.
Kanadiske styresmakter skal ha samarbeida med FBI og det amerikanske tryggingsdepartementet i etterforskinga av terrorplanlegginga.
