To personar vart arrestert tidleg måndag for å ha planlagt terror mot eit passasjertog på ein av dei viktigaste jernbanelinjene i Nord-Amerika.
Politiet i Canada seier på ein pressekonferanse i kveld at terrorplanane gjekk ut på å angripe jernbanen som går frå den kanadiske byen Toronto til New York City.
– Det ville ha resultert i at uskuldige ville blitt drepne eller skadd, seier ein talsperson for politiet i Canada.
Dei opplyser at dei arresterte hadde både kapasitet og intensjon om å utføre angrepet. Politiet seier at dei to hadde nøye observert tog og jernbanestrekninga i Toronto-området.
Al-Qaida-kopling
Namna på dei sikta er Chiheb Esseghaier og Raed Jaser. Dei er busett i Toronto og Montreal, og er ikkje kanadiske statsborgarar.
Ifølge politiet skal dei to arresterte vere kopla til al-Qaida.
– Dei har fått støtte frå al-Qaida i Iran i form av veiledning, seier politiet.
Politiet vil ikkje seie kva slags metode dei arresterte hadde planlagt å bruke i terroråtaket.
Kjelder i politiet fortel til kanadiske CBC News at dei arresterte skal ha vore under overvaking i meir enn eit år i provinsane Quebec og Ontario.
Kanadiske styresmakter skal ha samarbeida med FBI og det amerikanske tryggingsdepartementet i etterforskinga av terrorplanlegginga.
Det skal ikkje vere noko kopling mellom denne saka og terroråtaket under Boston Marathon.