Ei grein av den islamistiske organisasjonen Taliban seier dei står bak angrepet. Ein talsmann for politiet seier at ein mann på motorsykkel køyrde inn blant fleire hundre farmasøytar som demonstrerte mot ei ny lov som regulerer sal av legemiddel, og detonerte bomba.
Geo-TV melder at sjefen for trafikkpolitiet i byen, Ahmed Mobeen, er blant dei drepne i angrepet. Eksplosjonen var svært kraftig, fortel augevitne. Minst 60 menneske er såra i angrepet.
Stort behov for blod
Styresmaktene gjekk raskt ut og bad folk om å melde seg på sjukehusa i byen for å gi blod, og mange har fylgt oppmodinga.
Etter angrepet er politiet i hovudstaden Islamabad sett i høgste beredskap i frykt for angrep også der.
Styresmaktene i Pakistan sende 7. februar ut ei åtvaring om at ei «uidentifisert terrorgruppe» hadde planlagt eit angrep i Lahore. Dette gjorde at tryggleiken ved viktige bygningar i byen vart trappa opp.
Taliban-fraksjon
Taliban-fraksjonen Jamal u-Ahrar har trua med å gjennomføre slike angrep. Denne gruppa tok på seg skulda for bombeangrepet i ein park i Lahore i påska i fjor, då over 70 menneske vart drepne.
Lahore er den nest største byen i Pakistan med rundt 10 millionar innbyggjarar. Karachi er størst.
Saka blir oppdatert