Lege inne på Gazas største sjukehus: – Fullstendig kollaps

Vi åtvarar mot sterke inntrykk i saka.

Denne veka gjekk eit titals FN-leiarar ut og bad om humanitær våpenkvile. Fleire enn 10.000 palestinarar er drepne.

Blant dei er 192 helsearbeidarar, hevdar talsperson for det Hamas-styrte helsedepartement, legen Ashraf al-Qudra.

Ifølge al-Qudra fungerer helsevesenet i Gaza på under ein tredel av den vanlege kapasiteten, og at helsepersonellet er under direkte angrep.

– Heile systemet har fullstendig kollapsa, seier han til NRK frå innsida av Shifa-sjukehuset. Intervjuet er gjort onsdag morgon.

– Vi går no inn i nokre kritiske timar. Vi kjem ikkje til å klare å yte medisinsk hjelp til dei som treng det, seier al-Qudra.

Nokre timar seinare melder palestinske Røde halvmåne at sjukehuset Al-Quds er tomt for drivstoff. Dermed er heller ikkje dette sjukehuset i stand til å yte dei fleste av tenestene dei gir.

IDF skriv til NRK at sidan Hamas-åtaket 7. oktober har dei «utkjempa ein krig mot terroristorganisasjonen, der vi tryggar Israel og innbyggjarane».

– Vi har bede folk på Gazastripa om å evakuere sørover, der det blir sett på som tryggare å vere, skriv IDF.

Tusenvis av flyktningar

Al-Shifa, som er det største medisinske komplekset i heile Gaza, er opphaldsstaden til mange titusen flyktningar.

– Det er ikkje ein centimeter her som ikkje er utan folk, seier al-Qudra vidare, og legg til at dette har ført til at sjukdommar smittar mellom menneska på sjukehuset.

– Det er på grunn av at mange skadde har opne sår. I tillegg har mange tredje- og fjerdegradsforbrenning.

Det israelske forsvaret (IDF) hevda i går at dei har soldatar inne i Gaza by. Al-Qudra trur dei er omtrent ein kilometer vekke frå sjukehuset.

– Vi fryktar at dei skal kome inn. Det er klart at vi som er her er helseteam og skadde. Desse sjukehusa er her for å yte helsetenester.

– Men IDF har skulda dykk for å bruke sjukehus som militærbase?

– Det er ikkje noko «uvanleg» rørsle her på sjukehuset. Dei israelske overvakingsflya dekker Gazastripa og al Shifa-sjukehuset time for time.

– Dersom det fanst bevis på det dei hevdar ville dei vist det til verda.

Erik Fosse: – Sjukehus på storleik med Ullevål

Lege Erik Fosse har sjølv vore på al-Shifa-sjukehuset fleire gonger, og bekreftar at kontaktane hans der opplever ein kritisk situasjon.

– No har dei knapt noko drivstoff igjen, dei har prioritert berre nokre få avdelingar som framleis er i drift. For nokre dagar sidan var det dobbelt så mange pasientar enn det dei har senger til. Det har no auka ytterlegare.

Fosse seier at mange skadde som elles ville ha overlevd no i praksis er dødsdømde.

– Det er eit relativt omgrep om folk er skadde eller døyr. Dei som vanlegvis ville vorte prioriterte for omgåande behandling, dei vert sorterte i gruppa håplause, som då døyr.

Legen kallar Israel si utsegn om evakuering for «ein bløff».

– Shifa er eit sjukehus på storleik med Ullevål. Det Israel ber om er som at ein skulle evakuert Ullevål sjukehus på dagen og drege til Fredrikstad, men der er dessverre alle sjukehusa fulle. Det er heilt umogleg.

Fosse trur Israel går til målretta angrep mot sjukehusa.

– Dei seier at Hamas har hovudkvarter overalt, for dei har bomba alle sjukehusa i nord med den same grunngivinga. Dette er noko dei alltid seier, og vi har aldri sett nokre soldatar eller konkrete bevis. Eg mistenkjer at dette er eit arbeid for å øydeleggje infrastrukturen. Dei gjer at Nord-Gaza ikkje er til å bu i.

IDF og den israelske regjeringa har tidlegare uttalt at dei kun fører krig med Hamas, og ikkje ønskjer å råka sivile.

– Hamas har halde fram med å angripe Israel, og samstundes gjort seg sjølv til del av sivil infrastruktur. IDF vil få slutt på angrepa, og vil råke Hamas der det er naudsynt, skriv IDF til NRK torsdag.

Måndag la dei fram et bilete av eit hol i bakken utanfor Sheikh Hamad-sjukehuset i Jabalia-leiren som bevis på at dei råka eit militært mål.

Babyar døde av oksygenmangel

Sidan krigsutbrotet 7. oktober har 5500 babyar vorte fødde på Gazastripa, seier Natalia Kanem i FN sitt befolkningsfond.

Ho seier FN har ikkje tal på nye mødrer eller nyfødde babyar som har døydd sidan krigen byrja, men at det hastar med å få inn drivstoff til sjukehusa i Gaza.

Dette slik at dei har nok straum til kuvøsene.

Kanem seier nyfødde babyar har døydd som fylgje av at det ikkje har vore nok oksygen eller kuvøser tilgjengeleg.

Ho understrekar at gravide treng dobbelt så mykje væske som andre kvinner. Dersom du ammar treng du tre gonger så mykje.