Laurdag gav Taliban alle ikkje-statlege organisasjonar ordre om ikkje å la kvinneleg tilsette komme på jobb.
Søndag seier hjelpeorganisasjonane Redd Barna, Flyktninghjelpen og Care at avgjerda frå Taliban-regimet hindrar dei i å nå born, kvinner og menn i desperat naud i Afghanistan, og at dei derfor ser seg nøydde til å innstille arbeidet sitt i landet inntil vidare.
– Vi frys alle operasjonane våre, og går i gang med å forhandle med Taliban om å få lik rett for kvinner og menn til å arbeide igjen. Så vi trekkjer oss ikkje ut av landet, seier generalsekretær Flyktninghjelpen, Jan Egeland til NRK.
– Avhengig av kvinnene
Han opplyser at organisasjonen har 470 kvinner tilsette i landet.
– Vi er heilt avhengig av desse kvinnene for å nå ut med hjelp til kvinner og born, seier Egeland.
I ei felles fråsegn krev dei tre organisasjonane at både menn og kvinner kan halde fram med livreddande bistand på lik linje.
– Afghanistan er i ei djup og akutt krise. Mange millionar er på kanten til hungersnaud. Mange millionar frys. Det er verkeleg elendige forhold der no, seier Egeland.
– Kler seg i strid med reglane
Avgjerda frå Taliban gjeld både utanlandske og afghanske organisasjonar, ifølgje eit offisielt brev frå næringsdepartementet i landet.
Ein talsmann for departementet seier at kvinner inntil vidare ikkje får lov til å jobbe fordi enkelte av dei har kledd seg i strid med Taliban si tolking av klesreglementet for kvinner.
Kvinner utestengde frå universiteta
For nokre dagar sidan blei det kjent at utdanningsdepartementet i Afghanistan hadde bestemt å stengje kvinner ute frå universiteta i landet inntil vidare.
I eit brev blir offentlege og private universitet instruerte til å suspendere tilgangen til kvinnelege studentar.
Brevet var underteikna Neda Mohammad Nadeem, som er utdanningsminister.
Etter at Taliban tok over makta i landet i fjor sommar, har dei også gjort det vanskelegare for jenter til å gå på ungdoms- og vidaregåande skule. Nå får dei berre gå på skulen til dei er ferdig i sjette klasse.