Frå opposisjonsavis til talerør for Erdogan

– Grunnloven er med dette oppheva, var orda til redaktør Abdulhamit Bilici i deira siste ordinære utgåve laurdag, på ein svart bakgrunn som skulle symbolisere det han omtala som ein mørk dag for tyrkisk presse.

• Les også: Aftenposten kastet ut av Tyrkia

Nettsida til avisa var ute av drift med beskjeden «Vi vil gi dykk, lesarane våre, betre kvalitet og ei meir objektiv teneste så snart som mogleg». Den engelske versjonen av nettsida hadde saker om EU sin kritikk mot overtakinga, men har ikkje vorte oppdatert sidan laurdag. Sjefredaktøren til Todays Zaman reagerte kraftig på Twitter.

Tok kontrollen over opposisjonsavis

Fredag kveld storma politi Istanbul-kontoret til avisa, og slo ned på protestar med tåregass og vasskanonar. Regjeringa viste til ein rettsordre som gav dei rett til å erstatte redaksjonen i det som er landets største opposisjonsavis med eit formyndarskap utnemnd av staten.

Dette er andre gong at regjeringa tek kontroll over eit mediehus som har tilknyting til Fethullah Gülen, ein innflytelsesrik imam som for tida er i eksil i USA.

Gülen er tidlegare alliert med president Erdogan, men dei siste åra har dei hatt fleire uovereinsstemmelsar, som toppa seg med ein korrupsjonsskandale i 2013, der fleire frå regjeringspartiet vart arresterte. Erdogan skuldar Gulen og hans folk for å stå bak dette, og å ha etablert ein terrororganisasjon som planlegg statskupp

– Ikkje ei politisk sak

Protestar mot overtakinga haldt fram gjennom helga. Menneskerettsorganisasjonar og europeiske politikarar har kritisert overtakinga, og sagt at dette krenker pressefridomen i landet, som er eit potensielt EU-medlem.

Statsminister Ahmet Davutoglu tilbakeviser kritikken og seier at dette er ei juridisk og ikkje ei politisk sak, og at ei etterforsking er starta for å finne ut om «ein terroristorganisasjon» har finansiert avisa.

• Les også: Krass EU-kritikk av Tyrkia

EU i skvis

EU er på si side i ein skvis ettersom dei er avhengige av eit samarbeid med Tyrkia om flyktningkrisa. EU og Tyrkia skal ha eit kritisk møte måndag i Brussel.

– EU må ikkje slå seg til ro med berre minne tyrkiske myndigheiter om prinsippene om pressefridom, seier organisasjonen Reportarar utan grenser (RSF) i ei pressemelding søndag.

– Dei må bruke all si makt. Det kan ikkje vere noko spørsmål om å ta opp att medlemskapsforhandlingar så lenge Ankara synleg trakkar på europeiske verdiar. Om ikkje EU stoppar å gi etter for utpressing når det gjeld migrantane vil dei gi inntrykk av at dei gir opp prinsippa unionen vart grunnlagd på.

Tyrkia ligg på 149.-plass blant 180 land på RSF sitt indeks over pressefridom i verda, og fleire journalistar og akademikarar har vorte fengsla under Erdogan.

• Les også: Tyrkiske redaktører løslatt fra fengsel