7. juli gjorde ein liten motorbåt strandhogg ved ein villa på den bulgarske svartehavskysten.
Om bord var Hristo Ivanov, ein tidlegare justisminister som leier anti-korrupsjonspartiet «Ja, Bulgaria!»
Han ville vise at stranda som skulle vere open for alle, i praksis var den private leikegrinda til ein mektig mann i landet.
Da Ivanov prøvde å plante det bulgarske flagget på stranda vart han skubba ut i sjøen av menn i solbriller, som seinare viste seg å vere agentar i sikkerheitspolitiet.
– Målet vårt er å ha eit Bulgaria for alle, sa Ivanov til eit filmteamet som strøyma det heile direkte til sosiale medium.
– Dritpakke
Ein knapp månad tidlegare måtte statsministeren i Bulgaria Boyko Borisov forklare seg om ein pinleg bildeserie som hadde byrja sirkulere på sosiale medium.
Ein sovande statsminister med pistol, eurosetlar og gullbarrar på nattbordet.
Statsministeren har dyrka eit image av seg sjølv som ein machomann, men dette vart for sterk kost for mange.
Borisov kalla inn til pressekonferanse og forklarte at det heile var ein dritpakke orkestrert av politiske rivalar og at bileta var manipulerte. Dei bulgarske gravejournalistane Bivol har analysert bilda og meiner dei er ekte.
Pressekonferansen toppa seg med skuldingar om at Bulgarias president Rumen Radev, hadde spionert på statsministeren med ei drone frå Kina.
Strid mellom statsminister og president
Det heile opna opp ein ny ordkrig mellom president og statsminister. Dei to har vore i tottane på kvarandre sidan Radev blei president i 2016.
Radev meiner Borisov berre lèt som han slår ned på korrupsjon, medan han eigentleg er i lomma på maktpersonane som tek seg til rette langs Svartehavet.
Radev har også prøvd å stanse utnemninga av ein Ivan Gashev til statsadvokat.
Dei bulgarske gravejournalistane i Bivol meiner Gashev har band til kriminelle, gjennom sambuaren sin, ei tidlegare nattklubb-dansarinne.
Raid mot presidentkontoret
Den 9. juli var det nettopp representantar for statsadvokaten som troppa opp på presidentens kontor med væpna agentar. Dei arresterte to personar i staben til presidenten, eit ledd i ei større etterforsking.
Dette skjedde dagen etter at presidenten hadde avslørt at det nettopp var statstilsette vakter som hadde jaga opposisjonspolitikar Ivanov frå stranda ved Svartehavet.
Aksjonen vart av mange sett på som ein hemnaksjon mot presidenten og utløyste forrykande demonstrasjonar i hovudstaden Sofia. Folk kasta egg, tomatar og toalettpapir på bygningen til statsministeren.
Sidan har det nesten kvar dag vore demonstrasjonar med krav om at statsminister Borisov og statsadvokaten hans går av.
Demonstrantane går med plakatar der dei skuldar regjeringa for å stå i ledtog med organisert kriminalitet, og at rettsvesenet er politisk styrt.
Ikkje sidan 2013 har statsminister Boyko Borisov vore i så hardt ver. Han har gjort nokre grep, som å skifte ut ministrar og han har kome med forslag om ulike reformer. Men demonstrasjonane held likevel fram med uforminska styrke.
– Truverdet til EU står på spel
Opposisjonspolitikaren som blei jaga frå stranda ved Svartehavet, Hristo Ivanov,
meiner det først og fremst er EU og Merkel si skuld at oligarkar og politikarar kan gjere som dei vil i Bulgaria.
I eit intervju med avisa Politico ber han Brussel og Berlin om å stille krav til den bulgarske regjeringa:
– Viss EU ikkje maktar å garantere eit minimum av ein rettsstat i eit land så svakt som Bulgaria, kva er då poenget, sa i Ivanov i intervjuet med Politico.
Han legg til at overføringane frå EU er med på å finansiere dette vanstyret.
– Det er truverdet til EU som står på spel, sa Ivanov til Politico.
Organisasjonen Transparency international rangerer Bulgaria som det mest korrupte landet i EU.