– Blaise, kom deg ut, ropar demonstrantane.
Blaise Compaoré har vore president i Burkina Faso i 27 år, men synest ikkje det er nok. No har han føreslått å gjennomføre ei folkerøysting som kan opne for at han kan stille til val på ny, og dermed kunne bli president i nok ein periode.
– Nasjonen eller døden
Hans forslag om å endre på landets lovar har ikkje blitt godt motteke av folket i Burkina Faso, og i landets hovudstad har mange tusen demonstrantar vore ute i gatene den siste veka.
Opposisjonsleiarar meiner at det kan ha vore så mange som oppunder ein million demonstrantar i gatene i Ouagadougou.
- LES OGSÅ:
- LES OGSÅ:
– Vår protesttog er allereie ein stor suksess. Fenomenalt. Vår kamp har gått inn i siste fase. Det er no eller aldri. Nasjonen eller døden, sa opposisjonsleiar Zephirin Diabre, ifølgje nyheitsbyrået AFP.
Nokre av demonstrantane skal ha sett fyr på dekk og kasta stein mot politiet, som svara med tåregass då demonstrantane kom for nær landets parlament.
Fryktar 15 nye år med same president
Skular og universitet blir haldne stengt på grunn av dei store demonstrasjonane, og hovudvegane inn til hovudstaden vert blokkerte av rasande ungdommar. Store folkemengder hadde også samla seg i sentrum av byen, der dei blåste i fløyter og vuvuzelaar.
Compaore var berre 36 år gamal då han tok over makta i Burkina Faso i 1987, som fram til 1984 gjekk under namnet Øvre Volta. Sidan den gong har han haldt fast ved makta i landet, og blitt velt om att som president ei rekkje gonger.
Men i 2005 vart det innført endringar i landets grunnlov, som førte til at ein president berre kan sitte i to femårs periodar. Og Compaore har snart gjennomført sine to periodar, etter at lovane vart endra, og skal eigentleg finne noko anna å drive på med frå 2015.
No fryktar opposisjonen at presidentens nye lovforslag skal føre til at Compaore kan bli sittande ved makta i heile 15 år til. Og difor har dei tatt initiativ til å blokkere landets parlament, slik at ikkje handsaminga av lova kan skje.
Frankrike trugar med sanksjonar
Det er særskild den yngre delen av folket i Burkina Faso som misliker at presidenten vil endre lovane. Og heile 60 prosent av folket er under 25 år.
Med andre ord har minst 60 prosent av folket levd heile sitt liv under ein og same president, og landet er framleis blant dei fem minst utvikla landa i verda ifølgje FN sin levekårsindeks. Mange ønskjer no endring.
– Det er over for Blaise Compaoré. Mannen har hatt makta i 27 år, og me kan framleis ikkje kjøpe ein sekk med ris med den løna me har, seier ein ungdom den franske radiokanalen RFI.
Også tidlegare kolonimakt Frankrike har reagert på Compaoré sine planar. Frankrikes president François Hollande har sendt brev til Compaoré og bede han om å respektere Den afrikanske union statuttar om at afrikanske leiarar ikkje skal forsøke å forlenge si tid ved makta.
Å bryte statuttane kan føre til sanksjonar, trugar den franske presidenten. Frankrike har framleis tette band til Burkina Faso, og har tusenvis av soldatar utplassert i landet, som grensar til Mali, der Frankrike lenge har kjempa ein kamp mot islamistiske grupper.
Det er førebels ikkje kjent kva president Compaoré tenkjer om dei store protestane mot han.