69-åring dømd til seks år i fengsel for å flyge drone

Det var i fjor den 69-år gamle filmmakaren James Ricketson flaug ei drone over eit valmøte arrangert av opposisjonen i Kambodsja.

Sidan har han sote i arrest.

I dag vart han dømd til seks år i fengsel, og sonen seier til nyheitsbyrået at familien er heilt knust:

– Vi er veldig fortvilte, det har vore ein lang og hard prosess, og så får vi dette resultatet. Eg veit ikkje, vi treng litt tid på å fordøye dette, og finne ut kva vi skal gjere. Men vi skal ikkje gje opp, sa sonen James Ricketson til AP.

Arrestert før val på ny nasjonalforsamling

Ricketson var i Kambodsja for å lage ein dokumentarfilm om fattigdom, og ifølgje AP meiner ekspertar at arrestasjonen kom i samband med at styremaktene ville slå ned på kritiske røyster i forkant av valet på ny nasjonalforsamling i juli.

Eit val der statsminister Hun Sen og partiet hans, Kambodsjas folkeparti, gjorde reint bord. Dei fekk alle dei 125 seta i nasjonalforsamlinga.

• LES: Kambodsjas «sterke mann» erklærer valgseier

Hun Sen har ei fortid som kommandant i Raude Khmer, og har sidan 80-talet regjert landet med hard hand.

• LES: Ville skru klokka tilbake til år null

Menneskerettsorganisasjonar skuldar han for å kneble opposisjonspartia og ytringsfridomen i landet, samt at han leier eit regime som er prega av brot på menneskerettane og korrupsjon.

I 2014 opna politiet eld mot ei gruppe streikande tekstilarbeidarar, fire vart drepne og 20 skadde.

• LES: Tekstilarbeidere dømt etter streik i Kambodsja

Dømd for spionasje

Under rettssaka skulda statsadvokaten Ricketson for spionasje og landsforræderi. Han hevda dokumentarfilmmakaren hadde planar om å styrte regjeringa, og å gje hemmelege opplysningar til framande makter.

Han viste til at Ricketson hadde nære band til opposisjonspartiet, Det nasjonale redningspartiet, som vart gjort ulovleg i november i fjor.

• LES: Nordmann (22) arrestert for «pornografisk dansing» i Kambodsja

Ricketson og familien hans avviser skuldingane:

– Han har reist i Kambodsja i over 22 år, og fortalt historiene til fattigfolk. Å kalle dette spionasje er galskap, sa nevøen Bim Ricketson til The Guardian.