Utrykkingspolitiet (UP) skreiv ut 55 forenkla førelegg og tok ifrå fem sjåførar førarkortet på Dovrefjell i kveld.
Den raskaste av dei vart målt til 132 km/t i ei 80 sone.
– Skjer det ei ulykke i dei hastigheitene vi stadig ser der oppe, så er eg redd for at det vil gå veldig gale, seier Anders Sjøtrø.
Han er distriktsleiar i UP i Midt-Noreg.
Dagens kontroll føyer seg inn i rekkja av kontrollar på Dovrefjell med mange forenkla førelegg og førarkortbeslag.
– Det er veldig høg snittfart på Dovrefjell. Den går langt over fartsgrensa. Eg er bekymra, seier Sjøtrø.
UP kjem til å prioritere kontrollar på Dovrefjell fram til dei ser ei endring i fartsnivået til trafikantane. Når politiet no held kontrollar på fjellet, har dei stadig kapasitetsproblem, som gjer at dei ikkje stoppar alle dei elles ville stoppa for høg fart i 80 sona.
– Ein veldig stor andel av trafikken på Dovrefjell går langt over fartsgrensa, seier Sjøtrø.
NRK intervjua også i juni Sjøtrø om trafikken på Dovrefjell. Då peika han på at det har vore mange dødsulukker der før.
– Dei siste ti åra har vi i alle fall hatt fem dødsulukker der. Vi har ei viss prioritering av denne strekninga, men det vi har sett i det siste uroar meg veldig, sa han.
