Utrykkingspolitiet (UP) skreiv ut 36 forenkla førelegg og tok ifrå fem sjåførar førarkortet på Dovre i kveld. Kontrollen var på E6 Hjerkinn like over fylkesgrensa til Innlandet.
Den raskaste sjåføren vart målt i 198 km/t i ei 80-sone.
Anders Sjøtrø, distriktsleiar i UP i Midt-Noreg er svært bekymra.
– Det her er ein fartskontroll i rekkja av fleire den siste tida. Det gjennomsnittlege fartsnivået på Dovrefjell er urovekkjande høgt, seier han.
FLEIRE TATT I HØG FART: UP-Midt Noreg stoppa fleire personar i over 100 km/t på Dovre i dag.
Foto: UP18-åring stoppa i 198 km/t i 80 sone
Den raskaste sjåføren som mista lappen på Dovre i kveld var 18 år gammal og hadde berre hatt lappen i nokre få månadar, ifølgje politiet.
– Ingen av oss har råd til å miste nokon. Om vi har vener som køyrer på ein slik måte så snakk med dei. Kanskje det hjelper, seier Sjøtrø.
Om sommaren vert det meir trafikk på vegane i Noreg. No vil politiet halde fleire kontrollar på Dovre, som følgje av dei mange grove fartslovbrota der den siste tida.
– Den gjennomsnittlege farta der må ned. Får vi ein frontkollisjon i dei hastigheitene der, så er det nesten sikkert at nokon blir drepne, seier han.
Anders Sjøtrø, distriktsleiar i UP Midt.
Foto: Jøte Toftaker / NRKFryktar dødsulukker
UP-leiaren fortel at dei har sett veldig mange grove fartslovbrot på Dovre i det siste. Den gjennomsnittlege farta på trafikantane er langt over fartsgrensa på staden, erfarer Sjøtrø.
– Vi har faktisk hatt kapasitetsproblem med å reagere på hastigheit under 100 km/t. Det betyr at vi først har begynt å skrive førelegg når folk køyrer raskare enn det, seier han.
Ifølgje Sjøtrø har det vore mange dødsulukker på Dovre før.
– Dei siste ti åra har vi i alle fall hatt fem dødsulukker der. Vi har ei viss prioritering av denne strekninga, men det vi har sett i det siste uroar meg veldig, seier han.
