Det var natt til 23. desember i fjor at sambuaren til tiltalte vart funnen død i eit hus i Namsos.
I leilegheita var det også to mindreårige barn. Dei var vitne til deler av det som skjedde, opplyste politiet seinare.
Meiner ho handla i naudverje
Kvinna i 30-åra vart først sikta for grov kroppsskade med døden til følgje. Basert på bevis i etterforskinga vart siktinga endra til drap tre veker seinare.
Paret kom frå Ukraina via Tsjekkia som flyktningar same hausten. Den drepne i 30-åra var ikkje far til barna hennar.
Mora hevdar ho stakk sambuaren med kniv for å verje seg sjølv og barna.
– Min klient erkjenner ingen straffskuld etter tiltalen, seier advokaten hennar, Rolf Christensen.
I det første fengslingsmøtet på julaftan, hadde sikta ein plasterlapp i panna.
I fleire avhøyr har ho fortalt om eit turbulent samliv med avdøde i Namsos.
– Tema i denne saka er om det er ein situasjon som kan gje straffefritak eller ein reduksjon i straff på grunn av nødverje, seier Christensen.
– Tiltalte er ved forbausande godt mot
Ifølge tiltalen skal kvinna ha stukke sambuaren gjentatte gonger i ryggen, brystet og buken, slik at han fekk stikkskadar i blant anna høgre lunge og levra.
Han blødde i hel etter kort tid.
Rolf Christensen forsvarer kvinna som må møte i retten 18. september tiltalt for drap.
– Ho er ved forbausande godt mot med tanke på livssituasjonen sin. Ho har regelmessig fått møte barna sine og er godt nøgd med at dei ser ut til å ha det bra, seier Christensen til NRK.
I Ukraina er det gjort rettslege avhøyr med ein tidlegare ektefelle og ein sambuar av avdøde. Det er Christensen som har bede om dette for å belyse tiltalte sitt tidlegare liv.
– Barna har det etter forholda ganske bra
Det er barnevernet som tek hand om dei to ungane til tiltalte. Faren bur i Ukraina.
– Med tanke på at mor sit i fengsel, så har barna det etter forholda ganske bra. Det seier bistandsadvokat Hege Bjørgum Skillingstad til NRK.
Ungane har forklart seg fleire gonger i tilrettelagde avhøyr om det dei opplevde drapskvelden.
Mor og far til avdøde bur i det austlege Ukraina.
– Dei synest situasjonen er ekstra vanskeleg fordi dei er så langt unna, seier Eli Anne Tanberg Finne. Ho representerer foreldra til offeret.
Det er sett av seks dagar til rettssaka i Trøndelag tingrett i Namsos.