Blei megahit verda over – no tar trolla Nidarosdomen

– Når me skal lage ein sånn erkenorsk film som skal ut internasjonalt, så må me jo vise fram det finaste me har.

Det seier regissør Roar Uthaug om Trondheim og Nidarosdomen.

Netflix-filmen «Troll» var på topp over hele verda, og i​​ midten av mars blir det storinnrykk i bartebyen – for då skal «Troll 2» spelast inn.

Erkenorsk film

Filmen «Troll» tok utgangspunkt i Oslo og Slottet. I oppfølgaren er det Trondheim og Nidarosdomen som skal visast fram.

– Eg synest jo dette heilt klart er noko av det finaste me har, seier regissøren som ser på Nidarosdomen.

Og forventningane til oppfølgarfilmen er minst like store som til «Troll».

– Problemet no er at me hoppar etter oss sjølve, me hoppar ikkje etter Wirkola. Og det er mykje vanskelegare og nesten mykje meir frykt.

Det seier produsent for filmen, Espen Horn. Også filmkritikar i NRK, Birger Vestmo, har store forventningar til den komande filmen.

– Den første «Troll» fauk jo rett opp på Netflix-toppen over ikkje-engelske filmar, og det er all grunn til å tru at oppfølgaren vil bli sett av omtrent like mange, om ikkje fleire.

Birger Vestmo i Filmpolitiet gav filmen «Troll» terningkast fem.

– Det er først og fremst veldig gøy om Nidarosdomen verkeleg får ei sentral plassering i den nye «Troll»-filmen. Det er jo eit praktfullt bygg med arkitektoniske kvalitetar som passar veldig godt inn i ein fantasifilm som dette, legg Vestmo til.

Både han og ordførar i Trondheim, Kent Ranum, trur dette potensielt kan vere positivt for turisme og marknadsføring av byen.

– Det er steinbra. Eg blei så glad når dette endeleg blei bekrefta, legg Ranum til.

– Kan forvente smell og bang-bang

I midten av mars kjem det 150 personar til Trondheim for spele inn delar av «Troll 2» i Trondheim. Det kjem innbyggarane til å merke.

– Dei kan forvente noko smell og bang-bang, seier Horn.

For å få til eit godt samarbeid med alle i byen starta produksjonsselskapet dialog og samarbeid med forskjellige instansar for seks månader sidan.

– Me må oppføre oss som folk, vere hyggelege og sjarmerande menneske som lyttar til Trondheim by. Då vil dette bli verdas kulaste innspeling, legg Horn til.

Og det kan bli trønderar å sjå både bak og framfor kamera.

– Eg veit ikkje talet, men det er viktig for oss når me kjem til ein stad at me bruker den lokale befolkninga heile tida.

I tillegg til to veker med litt kø i byen og høge lydar, skal byen lysast opp på nattetid rundt Nidelva og Elgeseter bru.

– Og dei kan forvente ei heilt fantastisk premiere når den tid kjem i 2025. Me må ha ei ordentleg premierevisning i Trondheim by.