Norsk kulturminnefond har ein fondskapital på 200 millionar kroner. Fondskapitalen er plassert som kontolån i statskassa, og i 2003 blir avkastinga på 6,5 mill. kr. Av denne summen skal fem millionar kr nyttast til kulturminnetiltak medan 1,5 millionar kr går med til å dekkje drifta av fondet.
Røros har kompetanse
Som verdsarvområde har Røros over tid bygd opp kulturminnekompetanse som sekretariatet vil kunne dra nytte av i arbeidet sitt, skriv miljøverndepartementet i forslaget til statsbudsjett. I tillegg har kommunen eigen byantikvar og museum som òg har hatt innverknad på plasseringa.
I løpet av hausten 2002 vil det bli oppnemd styre og fastsett vedtekter for fondet. Fondets grunnidé er å få til eit maksimalt samspel mellom offentlege og private midlar.
Det er eit mål at Kulturminnefondet skal føre til meir fleksible og effektive samarbeidsformer mellom offentleg og privat sektor som kan gi ein styrkt verneinnsats.